ദുരിതാശ്വാസ നിധി തട്ടിപ്പ്, വിജിലൻസ് അന്വേഷണത്തിൽ കൂടുതൽ ക്രമക്കേടുകൾ പുറത്ത്, എറണാകുളത്ത് മരിച്ചയാളുടെ പേരിലും തുക അനുവദിച്ചു!

കൊച്ചി: മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് മരിച്ചയാൾക്കും ധനം സഹായ അനുവദിച്ചതായി വിജിലൻസ് കണ്ടെത്തി. എറണാകുളം സ്വദേശിയായ എം.പി. മുരളിയുടെ പേരിലാണ് 35000 രൂപ ധന സഹായം ഉത്തരവായത്. മുരളി മരിക്കുന്നതിന് മുമ്പാണ് അപേക്ഷ നൽകിയതെന്നും എന്നാൽ പണം കൈപ്പറ്റിയിട്ടില്ലെന്നുമാണ് കുടുംബം പറഞ്ഞത്. ഈ വിഷയത്തിൽ കൂടുതൽ പരിശോധന തുടങ്ങി വിജിലൻസ്.

കയർ തൊഴിലാളിയായിരുന്ന മുരളി വൃക്ക രോഗത്തെത്തുടർന്ന് കഴിഞ്ഞ ഡിസംബ‍ർ 29നാണ് മരിച്ചത്. എന്നാൽ മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് 35000 രൂപ മുരളിയുടെ പേരിൽ ചികിത്സാ ധനമായി അനുവദിച്ചിരുന്നു. ഇതേത്തുടർന്ന് വിജിലൻസ് നടത്തിയ അന്വേഷണത്തിലാണ് തട്ടിപ്പ് നടന്നതായുള്ള വിവരങ്ങൾ കിട്ടിയത്. മുരളി മരിച്ചതിന്റെ അടുത്ത ദിവസമായ ഡിസംബ‍ർ 30നാണ് ദുരാതാശ്വാസ നിധിയിൽ നിന്നുളള സഹായധനത്തിനായി അക്ഷയ വഴി അപേക്ഷിച്ചത്. റവന്യൂ ഉദ്യോഗസ്ഥർ നൽകിയ ശുപാർശ പ്രകാരമാണ് മരിച്ച മുരളിയ്ക്ക് 35000 രൂപ സഹായ ധനം അനുവദിച്ച് ഉത്തരവായത്. എന്നാൽ മുരളി മരിക്കുന്നതിന് മുൻപാണ് അപേക്ഷ നൽകിയതെന്നും പണം കൈപ്പറ്റിയിട്ടില്ലെന്നുമാണ് കുടുംബം വ്യക്തമാക്കിയത്. മുരളിയുടെ മരണ ശേഷം തന്നെയാണ് ധന സഹായത്തിന് അപേക്ഷിച്ചിരിക്കുന്നതെന്നാണ് വിജിലൻസിന്റെ കണ്ടെത്തൽ. വിഷയത്തിൽ വിശദമായ അന്വേഷണത്തിനൊരുങ്ങുകയാണ് വിജിലൻസ്.