നീട്ടി വയ്ക്കണമെന്ന ആവശ്യം തള്ളി! എസ്‌ഐആർ കേരളത്തിലും; നടപടിക്രമങ്ങൾ നാളെ മുതൽ ആരംഭിക്കാൻ നിർദേശം

ദില്ലി : നീട്ടി വയ്ക്കണമെന്ന ആവശ്യം തള്ളി കേരളത്തിലും എസ്‌ഐആർ. രാജ്യവ്യാപകമായി എസ്‌ഐആർ നടത്തുന്നതിന്റെ ആദ്യഘട്ടത്തിൽ കേരളമുൾപ്പെടെ 12 സംസ്ഥാനങ്ങളെയാണ് ഉൾപ്പെടുത്തിയിരിക്കുന്നത്. നേരത്തെ ബിഹാറിൽ എസ്ഐആർ വിജയകരമായി പൂർത്തിയാക്കിയിരുന്നു. നടപടിക്രമങ്ങൾ നാളെ മുതൽ ആരംഭിക്കാനാണ് നിർദേശം.

“സംസ്ഥാനങ്ങളിൽ നിന്നുള്ള തിരഞ്ഞെടുപ്പ് ഉദ്യോഗസ്ഥരുമായി സംസാരിച്ചു. എസ്ഐആർ പ്രക്രിയയെക്കുറിച്ച് വിശദമായി ചർച്ച ചെയ്തു. സ്വാതന്ത്ര്യത്തിനു ശേഷമുള്ള രാജ്യത്തെ ഒമ്പതാമത്തെ എസ്ഐആർ പ്രക്രിയയാണ് ഇത്. അവസാനമായി എസ്ഐആർ നടന്നത് 2002-04 ൽ ആണ്, 21 വർഷം മുമ്പ്. വിവിധ രാഷ്ട്രീയ പാർട്ടികൾ വോട്ടർപട്ടികയിൽ പ്രശ്നം ഉന്നയിച്ചിരുന്നെന്നും അപ്പീലുകളില്ലാതെയാണ് ബിഹാറിൽ എസ്ഐആർ പൂർത്തീകരിച്ചത്.”- ജ്ഞാനേഷ് കുമാർ പറഞ്ഞു.

എസ്ഐആർ നടപ്പിലാക്കുന്ന സംസ്ഥാനങ്ങളിൽ നാളെ മുതൽ വോട്ടർ പട്ടിക മരവിപ്പിക്കും. പിന്നീട് വിശദാംശങ്ങൾ ഉൾപ്പെടുത്തിയ ഫോമുകൾ വോട്ടർമാർക്ക് നൽകും. എസ്ഐആർ രണ്ടാം ഘട്ടത്തിലേക്കുള്ള പോളിങ് ഉദ്യോഗസ്ഥർക്കായുള്ള പരിശീലനം ചൊവ്വാഴ്ച ആരംഭിക്കുമെന്നും മുഖ്യ തെരഞ്ഞെടുപ്പ് കമ്മീഷണർ ജ്ഞാനേഷ് കുമാർ അറിയിച്ചു. അർഹരായ എല്ലാവർക്കും വോട്ട് ഉറപ്പാക്കുമെന്നും അനർഹരെ പട്ടികയിൽ നിന്ന് ഒഴിവാക്കുമെന്നും ജ്ഞാനേഷ് കുമാർ പറഞ്ഞു.