സന്ദീപ് വാര്യരുടെ പ്രസ്താവന വ്യക്തിപരം; പാര്‍ട്ടി നിലപാടല്ലെന്ന് ബിജെപി

തിരുവനന്തപുരം: പൗരത്വ ഭേദഗതി നിയമത്തിനെതിരെ തെരുവിലിറങ്ങിയ ചലച്ചിത്ര പ്രവര്‍ത്തകര്‍ക്കെതിരായ യുവമോര്‍ച്ചാ നേതാവ് സന്ദീപ് വാര്യരുടെ പ്രസ്താവനയെ തള്ളി ബിജെപി സംസ്ഥാന നേതൃത്വം. സന്ദീപ് വാര്യരുടെ പ്രസ്താവന വ്യക്തിപരമാണെന്ന് പാര്‍ട്ടി സംസ്ഥാന ജനറല്‍ സെക്രട്ടറി എം.ടി രമേശ് പറഞ്ഞു

സന്ദീപിന്റെ ഫേസ്ബുക്ക് കുറിപ്പ് വ്യക്തിപരമാണ്. അത് പാര്‍ട്ടി നിലപാടായി കാണേണ്ടേതില്ലെന്നും ബിജെപി നേതാവ് പറഞ്ഞു. കേന്ദ്രസര്‍ക്കാരിന് വിമര്‍ശിക്കുന്നവരോട് പകപോക്കുന്ന സമീപനം ബിജെപിക്കില്ലെന്നും എം.ടി രമേശ് പറഞ്ഞു.

സിനിമാക്കാര്‍ ഇന്‍കം ടാക്‌സ് അടയ്ക്കാതിരിക്കുന്നുണ്ടോ എന്ന് തനിക്കറിയില്ലെന്ന് ബിജെപി സംസ്ഥാന ജനറല്‍ സെക്രട്ടറി ശോഭാ സുരേന്ദ്രനും പ്രതികരിച്ചു. എല്ലാ പൗരന്മാരും ഇന്‍കം ടാക്‌സ് വെട്ടിപ്പ് നടത്താതെ അടയ്ക്കണമെന്ന അഭിപ്രായക്കാരിയാണ് ഞാന്‍. അതിന് സിനിമയെന്ന് വ്യത്യാസമില്ല, ബിസിനസെന്ന് വ്യത്യാസമില്ല. സിനിമാ മേഖലയില്‍ പ്രവര്‍ത്തിക്കുന്നവര്‍ മറ്റു വിഷയങ്ങളില്‍ പ്രതികരിക്കാതെ പൗരത്വ നിയമഭേദഗതിക്കെതിരെ പ്രതിഷേധിക്കുന്നത് എന്തിനാണെന്നും ശോഭാ സുരേന്ദ്രന്‍ ചോദിച്ചു.

കൊച്ചിയില്‍ നടന്ന പ്രതിഷേധത്തില്‍ പങ്കെടുത്ത സിനിമാക്കാര്‍ക്ക് എതിരെ കടുത്ത വിമര്‍ശനമാണ് സന്ദീപ് ഉന്നയിച്ചത്. നവ സിനിമക്കാര്‍ നികുതി അടയ്ക്കുന്നതില്‍ വീഴ്ച വരുത്താറുണ്ട്. നികുതി വെട്ടിപ്പ് കയ്യോടെ പിടിച്ചാല്‍ കണ്ണീരൊഴുക്കരുതെന്നും അന്ന് ജാഥ നടത്താന്‍ കഞ്ചാവ് ടീംസ് ഉണ്ടാകില്ലെന്നും പോസ്റ്റില്‍ സന്ദീപ് പറഞ്ഞിരുന്നു.