ചാന്ദ്ര ദൗത്യവുമായി വീണ്ടും റഷ്യ ; ലൂണ 25 പേടകം വെള്ളിയാഴ്ച വിക്ഷേപിക്കും

മോസ്കോ : ഒരു കാലത്ത് അമേരിക്കയുടെ നാസയോട് പോലും മത്സരിച്ചിരുന്ന റഷ്യയുടെ ബഹിരാകാശ ഏജൻസിയായ റോസ്കോസ്മോസ് അര നൂറ്റാണ്ടോളം നീണ്ട ഇടവേളയ്ക്ക് ശേഷം വീണ്ടും ചാന്ദ്ര ദൗത്യത്തിനൊരുങ്ങുന്നു . 1976ലെ ലൂണ – 24ന് ശേഷമുള്ള റഷ്യയുടെ ആദ്യ ചാന്ദ്ര ലാൻഡറായ ലൂണ – 25 ഈ വരുന്ന വെള്ളിയാഴ്ച വിക്ഷേപിക്കും.

റഷ്യൻ തലസ്ഥാനമായ മോസ്കോയിൽ നിന്ന് 5,550 കിലോമീറ്റർ അകലെ കിഴക്കുള്ള വോസ്റ്റോച്‌നി കോസ്മോഡ്രോമിൽ നിന്നാണ് വിക്ഷേപണം. വിക്ഷേപണത്തിന്റെ ഭാഗമായി, വെള്ളിയാഴ്ച പുലർച്ചെ, റഷ്യയുടെ വിദൂര കിഴക്കൻ മേഖലയിലെ ഖാബറോവ്‌സ്ക് മേഖലയിലുള്ള ഷഖ്‌റ്റിൻസ്കീ ഗ്രാമത്തിലുള്ളവരെ ഒഴിപ്പിക്കുമെന്ന് അധികൃതർ അറിയിച്ചു. വിക്ഷേപണശേഷം റോക്കറ്റ് ബൂസ്റ്റർ വേർപെട്ട് ഇവിടേക്ക് പതിച്ചേക്കാമെന്നതിനാൽ മുൻകരുതലെന്നോണമാണ് തീരുമാനം.

സോയൂസ് – 2 റോക്കറ്റിൽ വിക്ഷേപിക്കുന്ന ലൂണ – 25നെ ചന്ദ്രന്റെ ദക്ഷിണധ്രുവത്തിൽ സോഫ്റ്റ്‌ലാൻഡിംഗ് നടത്താനാണ് പദ്ധതിയിടുന്നത്. ലൂണ – 25 എന്ന് ലാൻഡ് ചെയ്യുമെന്ന് റഷ്യ വ്യക്തമാക്കിയിട്ടില്ല. ഇന്ത്യയുടെ ചന്ദ്രയാൻ 3 ദൗത്യവും ചന്ദ്രന്റെ ദക്ഷിണധ്രുവത്തെ ലക്ഷ്യമാക്കിയാണ് കുതിക്കുന്നത്.

ചന്ദ്രന്റെ ആന്തരിക ഘടന,​ ജലസാന്നിദ്ധ്യം തുടങ്ങിയവ സംബന്ധിച്ച ഗവേഷണമാണ് പേടകം ലക്ഷ്യമിടുന്നത് .