റഷ്യക്ക് കുലുക്കമില്ല; ഉപരോധങ്ങളിൽ തളരില്ല ലക്‌ഷ്യം കാണാതെ പിന്നോട്ടില്ല; വെടിനിർത്തലിനായി യുക്രൈൻ ശ്രമം

മോസ്കൊ: പുടിൻ ആസൂത്രണം ചെയ്തത് പോലെയല്ല ഇപ്പോള്‍ യുക്രൈന്‍-റഷ്യ യുദ്ധം നടക്കുന്നതെന്ന യുഎസ് സ്‌റ്റേറ്റ് സെക്രട്ടറി ആന്റണി ബ്ലിങ്കന്റെ പ്രസ്താവനക്ക് റഷ്യൻ പ്രസിഡൻറ് വ്ളാഡിമിർ പുടിന്റെ മറുപടി. റഷ്യക്കെതിരായ പശ്ചാത്ത്യ രാജ്യങ്ങളുടെ ഉപരോധം യുദ്ധ പ്രഖ്യാപനത്തിന് സമാനമാണെന്ന് അദ്ദേഹം പറഞ്ഞു. യുക്രൈന്‍ അധിനിവേശം തങ്ങള്‍ ആസൂത്രണം ചെയ്തത് പോലെ തന്നെയാണ് നടക്കുന്നതെന്നും അദ്ദേഹം വ്യക്തമാക്കി. യുക്രൈൻ വ്യോമ മേഖല നോ ഫ്ലൈ സോൺ ആയി പ്രഖ്യാപിക്കണമെന്ന് നാറ്റോ രാജ്യങ്ങളോട് പ്രസിഡന്റ് സെലിൻസ്കി ആവശ്യപ്പെട്ടിരുന്നു. പക്ഷെ അങ്ങനെ ഒരു സാഹചര്യമുണ്ടായാൽ യുദ്ധം റഷ്യയും നാറ്റോയും തമ്മിലായിരിക്കുമെന്നും റഷ്യ വ്യക്തമാക്കുന്നു. വിവിധ രാജ്യങ്ങൾ റഷ്യയുടെ മേൽ പ്രഖ്യാപിച്ചിട്ടുള്ള ഉപരോധങ്ങൾ ആഗോള സമ്പദ് വ്യവസ്ഥയെ തന്നെ ദോഷകരമായി ബാധിക്കുമെന്ന് വിദഗ്‌ധർ വിലയിരുത്തുന്നു. ഉപരോധങ്ങൾക്കിടയിലും യുക്രൈനിന്റെ കൂടുതൽ പ്രദേശങ്ങളിലേക്ക് റഷ്യൻ മുന്നേറ്റം തുടരുന്നു. കനത്ത ആക്രമണം നടത്തുന്ന സുമിയിൽ ഇന്ത്യൻ വിദ്യാർത്ഥികൾ കുടുങ്ങിക്കിടക്കുന്നു. അവർക്കായി സുരക്ഷിത പാതയൊരുക്കാൻ ഇരു രാജ്യങ്ങളുമായും റെഡ്‌ക്രെസന്റ് പോലുള്ള ഏജൻസികളുമായും ഇന്ത്യ ചർച്ച നടത്തുകയാണ്. ഇതിനിടെ വെടിനിർത്തലിനായി റഷ്യക്കുമേൽ സമ്മർദ്ദം ചെലുത്താൻ ഇന്ത്യയടക്കമുള്ള രാജ്യങ്ങളോട് യുക്രൈൻ അഭ്യർത്ഥന നടത്തി.

ഇതിനിടെ രാജ്യത്ത് സൈനിക നിയമം പ്രഖ്യാപിക്കാന്‍ താന്‍ ഉദ്ദേശിക്കുന്നില്ലെന്ന് പുടിന്‍ വ്യക്തമാക്കി. ബാഹ്യമായ ആക്രമണം ഉള്ള സന്ദര്‍ഭങ്ങളില്‍ മാത്രമേ സൈനിക നിയമം നടപ്പാക്കൂ. ഇപ്പോള്‍ അത്തരം സന്ദര്‍ഭം രാജ്യത്തില്ലെന്നും അദ്ദേഹം പറഞ്ഞു.