കീവിലെ ഷെല്ലാക്രമണത്തിൽ റഷ്യൻ മാദ്ധ്യമ പ്രവർത്തക കൊല്ലപ്പെട്ടു

കീവ്: യുക്രൈൻ തലസ്ഥാന നഗരമായ കീവിൽ നടന്ന ഷെല്ലാക്രമണത്തിൽ റഷ്യൻ മാദ്ധ്യമ പ്രവർത്തക കൊല്ലപ്പെട്ടു. ഒക്‌സാന ബൗലിനയാണ് കൊല്ലപ്പെട്ടത്. ‘ദി ഇൻസൈഡർ’ എന്ന ഇൻവെസ്റ്റിഗേറ്റീവ് വെബ്‌സൈറ്റിന്റെ റിപ്പോർട്ടറാണ് കൊല്ലപ്പെട്ട ഒക്‌സാന.

യുക്രൈനിൽ നടക്കുന്ന റഷ്യൻ ആക്രമണത്തിൽ തകർന്ന പൊഡിൽ പ്രദേശത്ത് റിപ്പോർട്ടിംഗിന് എത്തിയതായിരുന്നു ഒക്‌സാന. മാത്രമല്ല ബൗലിനയ്‌ക്ക് പുറമെ, മറ്റൊരു വ്യക്തിയും റഷ്യയുടെ ഷെല്ലാക്രമണത്തിൽ കൊല്ലപ്പെട്ടു. ഇവർക്കൊപ്പം രണ്ട് പേർക്ക് പരിക്കേറ്റതായും അന്താരാഷ്‌ട്ര മാദ്ധ്യമങ്ങൾ റിപ്പോർട്ട് ചെയ്തു.

അതേസമയം മാദ്ധ്യമ പ്രവർത്തകയുടെ മരണം ദി ഇൻസൈഡറും ഇതിനോടകം സ്ഥിരീകരിച്ചിട്ടുണ്ട്. റഷ്യയിലെ പ്രതിപക്ഷ നേതാവ് അലക്‌സി നവൽനിയുടെ അഴിമതി വിരുദ്ധ സംഘത്തിലെ പ്രവർത്തകയായിരുന്നു ഒക്‌സാന ബൗലിന.