സംസ്ഥാന പോലീസ് മേധാവി ഇനി എ കെ ജി സെന്റർ ഓഫീസ് സെക്രട്ടറി എന്നറിയപ്പെടും; സർക്കാരിനെ തിരുത്തേണ്ട പാർട്ടി സെക്രട്ടറി വിവരക്കേട് പറയുന്ന മാഷായി മാറിയിരിക്കുന്നു; മാദ്ധ്യമ പ്രവർത്തകർക്കെതിരെയുള്ള പോലീസ് നടപടിയിൽ പ്രതികരണവുമായി ഷിബു ബേബി ജോൺ

തിരുവനന്തപുരം: മാദ്ധ്യമ പ്രവർത്തകർക്കെതിരെയുള്ള പോലീസ് നടപടികളിൽ പ്രതികരിച്ച് മുൻമന്ത്രി ഷിബു ബേബി ജോൺ. സംസ്ഥാന പോലീസ് മേധാവി ഇനിമുതൽ എ ക ജി സെന്റർ ഓഫീസ് സെക്രട്ടറിയായി അറിയപ്പെടുമെന്നും പാർട്ടി സെക്രട്ടറി വിവരക്കേട് പറയുന്ന മാഷായി മാറിയിരിക്കുന്നുവെന്നും അദ്ദേഹം പറഞ്ഞു. മാദ്ധ്യമ പ്രവർത്തകർക്കെതിരെയുള്ള പോലീസ് നടപടികളിൽ പ്രതിഷേധിച്ച് RYF നടത്തിയ സെക്രട്ടറിയേറ്റ് മാർച്ച് ഉദ്‌ഘാടനം ചെയ്യുകയായിരുന്നു അദ്ദേഹം. ലോകത്തെല്ലായിടത്തും ഏകാധിപതികളുടെ പതനം അവരുടെ മണ്ടത്തരം കാരണമായിരുന്നുവെന്ന് സർക്കാർ മനസ്സിലാക്കണം. ഇത്തരം കാര്യങ്ങളിൽ സർക്കാരിനെ തിരുത്തേണ്ടത് പാർട്ടി സെക്രട്ടറിയുടെ കടമയാണ്. എന്നാൽ വിവരക്കേട് പറയുന്ന മാഷായി പാർട്ടി സെക്രട്ടറി മാറിയിരിക്കുകയാണെന്നും അദ്ദേഹം കൂട്ടിച്ചേർത്തു. സർക്കാർ വിരുദ്ധ എസ് എഫ് ഐ വിരുദ്ധ ക്യാമ്പയിൻ തുടർന്നാൽ ഇനിയും കേസെടുക്കുമെന്ന് എം വി ഗോവിന്ദൻ പറഞ്ഞിരുന്നു.

മാദ്ധ്യമ സ്വാതന്ത്ര്യത്തിനെതിരെയുള്ള സർക്കാർ നടപടികളിൽ പ്രതിഷേധിച്ചാണ് RYF സെക്രട്ടറിയേറ്റ് മാർച്ച് നടത്തിയത്. സ്ക്രട്ടറിയേറ്റ് പടിക്കൽ പ്രവർത്തകർ ‘എ കെ ജി സെന്റർ അനക്സ്’ എന്ന ബോർഡ് സ്ഥാപിച്ചു. തുടർന്ന് പോലീസും പ്രവർത്തകരും തമ്മിൽ ഏറ്റുമുട്ടി. പ്രവർത്തകർക്ക് നേരെ പോലീസ് ജലപീരങ്കി പ്രയോഗിച്ചു. കൊച്ചിയിൽ മാദ്ധ്യമ പ്രവർത്തകരുടെ സംഘടനയായ കെ യു ഡബ്ള്യു ജെ യും പ്രതിഷേധമാർച്ച് നടത്തി.