ശബരിമല തീര്‍ത്ഥാടകരെ ചേർത്ത് പിടിച്ച് കേന്ദ്രസർക്കാർ !വിമാനങ്ങളിൽ ഇരുമുടിക്കെട്ടിൽ നെയ്യ് നിറച്ച നാളികേരം കൊണ്ടുപോകാൻ അനുമതി ; വ്യോമയാന മന്ത്രാലയം ഉത്തരവിറക്കി

ശബരിമല തീര്‍ത്ഥാടകര്‍ക്ക് വിമാനത്തില്‍ ഇരുമുടിക്കെട്ടില്‍ നെയ്യ് നിറച്ച നാളികേരം കൊണ്ടുപോകാന്‍ അനുമതി നൽകിക്കൊണ്ട് ഉത്തരവിറക്കി വ്യോമയാന മന്ത്രാലയം. 2025 ജനുവരി 20 വരെയാണ് ഇതിനുള്ള അനുമതി നല്‍കിയിരിക്കുന്നത്. നിലവിലെ മാനദണ്ഡങ്ങള്‍ പ്രകാരം തീപിടിക്കാന്‍ സാധ്യതയുള്ളത് ചൂണ്ടിക്കാട്ടിയാണ് വിമാനയാത്രക്കിടെ നാളികേരം കൊണ്ടുപോകുന്നതിന് വിലക്ക് ഉണ്ടായിരുന്നത്.

ചെക് ഇന്‍ ബാഗേജില്‍ നാളികേരം ഉള്‍പ്പെടുത്താമെങ്കിലും ഇരുമുടിക്കെട്ടില്‍ നാളികേരം വച്ച് അത് കൈയിലുള്ള ബാഗില്‍ കയറ്റി കൊണ്ടുപോകാന്‍ മുന്‍പ് സാധിക്കില്ലായിരുന്നു. ഇതിലാണ് ഇപ്പോള്‍ മാറ്റമുണ്ടായിരിക്കുന്നത്. ശബരിമല തീര്‍ത്ഥാടകരുടെ ദീര്‍ഘകാലത്തെ അഭ്യര്‍ത്ഥന മാനിച്ചാണ് വ്യോമയാന മന്ത്രാലയം ഉത്തരവിറക്കിയിരിക്കുന്നത്. മകരവിളക്ക്, മണ്ഡലകാലം മുതലായവ പരിഗണിച്ചാകും തീര്‍ത്ഥാടകര്‍ക്ക് താത്ക്കാലിക ഇളവ് നല്‍കുക. അന്യസംസ്ഥാനങ്ങളിൽ നിന്ന് വരുന്ന ഭക്തർക്ക് ഇളവ് ഏറെ പ്രയോജനകരമാകും. സുരക്ഷാ പരിശോധനകളോട് തീര്‍ത്ഥാടകര്‍ സഹകരിക്കണമെന്നും വ്യോമയാന മന്ത്രാലയം അറിയിച്ചു.