ഡിവൈഎഫ്ഐ നേതാവിന്റെ അക്കൗണ്ടിൽ പട്ടികജാതിഫണ്ട്‌ എത്തിയതിൽ വൻ ഗൂഢാലോചന… തട്ടിപ്പ് ഉന്നതതല ഏജൻസി അന്വേഷിക്കണമെന്ന് ബിജെപി പട്ടികജാതി മോർച്ച

തിരുവനന്തപുരം: തിരുവനന്തപുരം കോർപ്പറേഷനിലെ പട്ടികജാതി വികസന ഫണ്ട് തട്ടിയെടുത്ത സംഭവത്തിൽ ഉന്നതതല ഏജൻസിയെക്കൊണ്ട് അന്വേഷിപ്പിക്കണമെന്ന് ബിജെപി പട്ടികജാതി മോർച്ച സംസ്ഥാന പ്രസിഡന്റ് ഷാജുമോൻ വട്ടേക്കാട്. കേരളം കണ്ടിട്ടുള്ളതിൽ വച്ച് ഏറ്റവും വലിയ തട്ടിപ്പാണ് നടന്നിരിക്കുന്നത്. പതിനാല് ജില്ലകളിലും ഇതിനു സമാനമായ തട്ടിപ്പുകൾ നടന്നിട്ടുണ്ടെന്നും, സംഭവത്തിലെ മുഴുവൻ പ്രതികൾക്കെതിരെയും തട്ടിപ്പിന് കൂട്ടുനിന്നവർക്കെതിരെയും പട്ടികജാതി-വർഗ അതിക്രമ നിരോധന നിയമപ്രകാരം കേസെടുക്കണമെന്നും അദ്ദേഹം തുറന്നടിച്ചു. കേന്ദ്ര പട്ടികജാതി വികസന ഫണ്ട് ചെലവഴിക്കാതെ കൊള്ളയടിക്കുകയാണ് സംസ്ഥാനസർക്കാർ ചെയ്യുന്നത്. കഴിഞ്ഞ അഞ്ചുവർഷം പട്ടികജാതി വികസനത്തിന് അനുവദിച്ച ഫണ്ടും, ചെലവഴിച്ച ഫണ്ടും കൂടി പരിശോധിച്ചാൽ തട്ടിപ്പിന്റെ ആഴം എത്രയാണെന്ന് വ്യക്തമായി അറിയാൻ സാധിക്കും. പട്ടികജാതി ഫണ്ട് കൊള്ളയടിച്ച സംഭവത്തിൽ ഉന്നതതല അന്വേഷണം ആവശ്യപ്പെട്ടു പട്ടികജാതി മോർച്ച സംസ്ഥാന പ്രക്ഷോഭം ശക്തമാക്കുമെന്നും ഷാജുമോൻ വട്ടേക്കാട് പറഞ്ഞു.

അതോടൊപ്പം കേസിലെ മുഴുവൻ പ്രതികളുടെയും ജാമ്യം റദ്ദ് ചെയ്യണം. പട്ടികജാതിക്കാരനല്ലാത്ത ഡിവൈഎഫ്ഐ സംസ്ഥാന നേതാവിന്റെയും, അച്ഛന്റെയും, അമ്മയുടെയും അക്കൗണ്ടിൽ പട്ടികജാതി ഫണ്ട്‌ എത്തിയതിൽ വൻ ഗൂഢാലോചനയാണ് നടന്നിരിക്കുന്നത്. ട്രഷറി, കോർപ്പറേഷൻ, പട്ടികജാതി വികസന വകുപ്പ് എന്നിവിടങ്ങളിലെ ഉന്നത ഉദ്യോഗസ്ഥരുടെ ആസൂത്രണമില്ലാതെ ഇത് നടക്കില്ല എന്നും അദ്ദേഹം വ്യക്തമാക്കി.

അതേസമയം ഈ ഫണ്ട് ഏറ്റവുമധികം ലാപ്‌സാക്കുകയും വകമാറ്റി ചെലവഴിക്കുകയും ചെയ്യുന്ന ഒരു സംസ്ഥാനം കൂടിയാണ് കേരളം. സംഭവത്തിൽ ഡിവൈഎഫ്ഐ ഉന്നത നേതാക്കളുടെ പങ്കും അന്വേഷണ വിധേയമാക്കണമെന്നും പട്ടികജാതി മോർച്ച സംസ്ഥാന പ്രസിഡന്റ് ആവശ്യപ്പെട്ടു. പട്ടികജാതി വികസന ഫണ്ട് വകമാറ്റി ചെലവഴിക്കുന്നത് ഗുരുതരമായ കുറ്റമാണെന്നും അദ്ദേഹം ചൂണ്ടിക്കാട്ടി.

പ്രത്യേക അറിയിപ്പ്: കോവിഡ് മഹാമാരിയുടെ രണ്ടാം വരവിന്റെ കാലത്ത് എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹിക അകലം പാലിച്ചും വാക്‌സിൻ എടുത്തും പ്രതിരോധത്തിന് തയ്യാറാവണമെന്ന് തത്വമയി ന്യൂസ് അഭ്യർത്ഥിക്കുന്നു. ഓർക്കുക ഒന്നിച്ചു നിന്നാൽ നമുക്കീ മഹാമാരിയെ തോൽപ്പിക്കാനാവും. “സർക്കാർ നിർദ്ദേശങ്ങൾ പാലിക്കാം, നമുക്ക് മഹാമാരിയെ ഒന്നിച്ചു നേരിടാം”. വാക്സിന് എടുത്തും, സാമൂഹിക അകലം പാലിച്ചും, മാസ്ക് ധരിച്ചും ഈ മഹാമാരിയെ നമുക്ക് എത്രയുംവേഗം വേരോടെ പിഴുതെറിയാം. #BreakTheChain #CovidBreak #IndiaFightsCorona