പശുക്കൾക്കിത് കലി കാലം ; ചെർമ്മമുഴ രോഗം വ്യാപകം ,കാസര്‍കോട്ട് നിരവധി പശുക്കൾ ചത്തൊടുങ്ങി ,കടുത്ത പ്രതിസന്ധിയിൽ ക്ഷീര കർഷകർ

കാസര്‍കോട് : ജില്ലയില്‍ പശുക്കളിക്കിടയിൽ ചർമ്മമുഴരോഗം വ്യാപിക്കുന്നു.രോഗത്തെത്തുടർന്ന് നിരവധി കന്നുകാലികളാണ് ചത്തൊടുങ്ങുന്നത്.രോഗം ബാധിക്കുന്ന പശുക്കളുടെ എണ്ണം ദിനംപ്രതി വർദ്ധിച്ച് വരികയാണ്. ഉദുമ, ബന്തടുക്ക എന്നിവിടങ്ങളിലാണ് രോഗം മൂർധന്യാവസ്ഥയിലെത്തും വിധം വ്യാപിച്ചത്.ബാക്കിയുള്ള ഇടങ്ങളിൽ രോഗതീവ്രത കുറവാണ്.ഇത് സംബന്ധിച്ച് കടുത്ത പ്രതിസന്ധി നേരിടുകയാണ് ക്ഷീര കർഷകർ.ലംപി സ്കിന്‍ ഡിസീസ് അഥവാ ചര്‍മ്മ മുഴ രോഗം കന്നുകാലികളില്‍ പടര്‍ന്നതോടെ പാല്‍ ഉത്പാദനത്തില്‍ നിന്നുള്ള വരുമാനം കൊണ്ട് മാത്രം ജീവിക്കുന്നവരാണ് പ്രതിസന്ധിയിലായത്.

ശരീരത്തില്‍ കുരുക്കളുണ്ടായി അവ പൊട്ടിയൊലിക്കുന്നതാണ് രോഗം. ശക്തമായ പനിയുമുണ്ടാകും.പാലുല്‍പാദനവും പ്രത്യുല്‍പാദനക്ഷമതയുമെല്ലാം ഗണ്യമായി കുറയ്ക്കുന്നതാണ് ചര്‍മ്മമുഴ രോഗം.വാക്സിനേഷന്‍ ഡ്രൈവുമായി മൃഗസംരക്ഷണ വകുപ്പ് രംഗത്തുണ്ട്. ഇതിനകം 12,328 കന്നുകാലികള്‍ക്ക് ജില്ലയില്‍ വാക്സിൻ നല്‍കിയിട്ടുണ്ട്. വൈറസ് മൂലമുള്ള രോഗമായത് കൊണ്ട് തന്നെ അസുഖം വന്നതിന് ശേഷം വാക്സിന്‍ എടുത്തത് കൊണ്ട് കാര്യമില്ല. ആരോഗ്യമുള്ള പശുക്കൾക്ക് എത്രയും വേഗം കുത്തിവെപ്പെടുക്കാന്‍ ശ്രദ്ധിക്കണമെന്ന് മൃഗസംരക്ഷണ വകുപ്പ് അധികൃതര്‍ നിര്‍ദ്ദേശിക്കുന്നു