സ്കൂളോ സ്നേക്ക് പാർക്കോ? സയൻസ് ലാബിന്റെ ഷോകെയ്സിൽ നാലടി നീളമുള്ള മൂർഖൻ; നിലമ്പൂർ സ്കൂളിൽ നിന്നും പാമ്പിനെ പിടികൂടുന്നത് ഇത് നാലാം തവണ!

മലപ്പുറം: നിലമ്പൂർ നഗരത്തിൽ ഗവ. മോഡൽ യുപി സ്കൂളിലെ സയൻസ് ലാബിന്റെ ഷോകെയ്സിൽ നിന്ന് പിടികൂടിയത് നാലടി നീളമുള്ള മൂർഖനെ. ഞായറാഴ്ച വൈകിട്ട് നാല് മണിയോടെയാണ് അദ്ധ്യാപകർ പാമ്പിനെ കണ്ടത്. സ്കൂളിൽ അറ്റകുറ്റപണി നടക്കുന്നതുമായി ബന്ധപ്പെട്ട് എത്തിയതായിരുന്നു അദ്ധ്യാപകർ. ചേരയാകുമെന്നു കരുതി ഓടിച്ചുവിടുന്നതിനിടെ പാമ്പ് ഷോകെയ്സിൽ കയറി ഒളിക്കുകയായിരുന്നു.

തുടർന്നു വനംവകുപ്പിന്റ ആർആർടി ടീമിനെ വിവരമറിയിച്ചു. ഡെപ്യൂട്ടി എ.എസ്.ബിജു, എസ്എഫ്ഒ നാസിർ, ബിഎഫ്ഒമാരായ റിയാസ് സതീഷ്, ഡ്രൈവർ വിശ്വനാഥൻ, സ്നേക് മാസ്റ്റർ സി.ടി.അസീസ് എന്നിവരെത്തി പാമ്പിനെ പിടികൂടി.

ഞായറാഴ്ച സ്കൂൾ അവധിയായതിനാൽ കുട്ടികളില്ലായിരുന്നു. നാലാം തവണയാണ് സ്കൂളിൽനിന്നു പാമ്പുകളെ പിടികൂടുന്നത്. സ്കൂൾ അധികൃതർക്ക് വേണ്ട മുൻകരുതലുകളും നിർദേശങ്ങളും നൽകിയതിന് ശേഷമാണ് ആർആർടി ടീം പാമ്പുമായി മടങ്ങിയത്.