ഗൂഢാലോചനയെന്ന് വിളിച്ച് തകർക്കാനുള്ള ഭീകരരുടെ ശ്രമങ്ങൾ വിലപ്പോയില്ല ! കശ്മീരിൽ വരും തലമുറയ്ക്ക് അറിവിന്റെ വെളിച്ചം പകരാൻ 1250 വിദ്യാലയങ്ങളുമായി സേവാ ഭാരതി

കശ്മീരിൽ 1250 ഓളം വിദ്യാലയങ്ങളുടെ സേവാഭാരതി . കശ്മീരിലെ 10 ജില്ലകളിലായാണ് 1250 ഏകല്‍ വിദ്യാലയങ്ങളാണ് സേവാഭാരതിയിലൂടെ വരും തലമുറയ്ക്ക് അറിവിന്റെ വെളിച്ചം പകരുക. 180 ഓളം സ്‌കൂളുകള്‍ ബാരാമുള്ള ജില്ലയിലാണ് പ്രവര്‍ത്തിക്കുന്നത്. നിരവധി ഭീകരാക്രമണം നടന്ന ജില്ല കൂടിയാണിത്.

ഏകല്‍ വിദ്യാലയ അഭിയാന്‍ പ്രോജക്ടിന് കീഴില്‍ ഭാരതീയതയും ഭാരതത്തിന്റെ പൗരനായിരിക്കേണ്ടതിന്റെ ആവശ്യകതയെപ്പറ്റിയുള്ള ചര്‍ച്ചകളും പഠനവുമാണ് ഇവിടെ നടക്കുന്നത്.ആയിരക്കണക്കിന് കുട്ടികളാണ് ഇവിടെ വിദ്യാഭ്യാസം നേടുന്നത്.

ഏകല്‍ വിദ്യാലയങ്ങളുടെ എണ്ണത്തില്‍ മുന്‍വര്‍ഷങ്ങളെ അപേക്ഷിച്ച് ഏകദേശം 53 ശതമാനം വര്‍ധനവാണ് രേഖപ്പെടുത്തിയത്. ആദ്യം 800 വിദ്യാലയങ്ങളാണ് ഉണ്ടായിരുന്നത്. രണ്ട് വര്‍ഷത്തിനിടെ അത് 1250 ആയി ഉയര്‍ന്നു.ഈ സ്‌കൂളുകളുടെ നടത്തിപ്പിന് സേവാഭാരതിക്ക് ജനങ്ങളിൽ നിന്ന് വലിയ പിന്തുണയും ലഭിക്കുന്നുണ്ട്.

“ഈ സ്കൂളുകളിൽ കശ്മീരി, ഉറുദു ഭാഷകൾ പഠിപ്പിക്കുന്നു. ഞങ്ങളുടെ കുട്ടികൾ തീവ്രവാദികളുടെ കൂട്ടാളികളാകാനോ കല്ലേറ് നടത്തുന്നവരുടെ കൂട്ടത്തിൽ ചേരാനോ ഞങ്ങൾ ആഗ്രഹിക്കുന്നില്ല. കഴിഞ്ഞ അഞ്ച് വർഷമായി ബാരാമുള്ള ജില്ലയിലെ ഏകൽ വിദ്യാലയത്തിലെ ഒരു വിദ്യാർത്ഥിയും പണത്തിന് വേണ്ടി സ്‌കൂൾ വിടുകയോ കല്ലെറിഞ്ഞവരുടെ കൂട്ടത്തിൽ ആരും ചേരുകയോ ചെയ്തിട്ടില്ല . ഇവിടെ പഠിക്കുന്ന വിദ്യാർത്ഥികൾ അഭിമാനമുള്ള ഹിന്ദുസ്ഥാനി മുസ്ലീങ്ങളാണ്. ഞങ്ങൾ അവരെ ഖുറാനും പഠിപ്പിക്കുന്നു. ഇത് മാത്രമല്ല, ഞങ്ങൾക്ക് ഒരു സംഘടനയിൽ നിന്നും ഒരു ഭീഷണിയും ലഭിച്ചിട്ടില്ല, ആരും ഞങ്ങളെ എതിർത്തിട്ടില്ല.“ പദ്ധതിയുമായി ബന്ധപ്പെട്ട അധ്യാപകനായ അമീർ മിർസ പറഞ്ഞു.

ഈ പദ്ധതിയെ ആദ്യ കാലങ്ങളിൽ ഗൂഢാലോചനയെന്ന് വിളിച്ച് തകർക്കാൻ ഭീകരർ ശ്രമിച്ചെങ്കിലും സേവാഭാരതി ഉറച്ചുനിന്നു. നാട്ടുകാരുടെ പിന്തുണയും ലഭിച്ചു. നടത്തിപ്പ് ചുമതലയിൽ മുഴുവൻ പ്രാദേശിക കശ്മീരികളാണ്. കശ്മീരിനെ രക്ഷിക്കാനുള്ള പോരാട്ടം എന്നാണ് അവർ ഈ പദ്ധതിയെ വിളിക്കുന്നത്. ഒരു ദശാബ്ദത്തിലേറെയായി ഏകൽ വിദ്യാലയങ്ങൾ ഈ പ്രദേശത്ത് പ്രവർത്തിക്കുന്നു. എന്നാൽ കഴിഞ്ഞ അഞ്ച്-ആറ് വർഷങ്ങളിൽ മാത്രമാണ് അവർക്ക് മികച്ച പ്രതികരണവും പിന്തുണയും നാട്ടുകാരിൽ നിന്ന് ലഭിച്ചത്. കഴിഞ്ഞ മാസം പ്രധാനമന്ത്രി നരേന്ദ്ര മോദിയുടെ എവോൾവ്ഡ് ഇന്ത്യ എവോൾവ്ഡ് ജമ്മു ആൻഡ് കശ്മീർ പരിപാടിക്ക് മികച്ച പൊതുജന പ്രതികരണമാണ് ലഭിച്ചത്.

വിദ്യാർത്ഥികളെ നല്ല പൗരന്മാരാക്കുക, കശ്മീരിന്റെ സമ്പന്നമായ സംസ്കാരവും പൈതൃകവും അവരെ പരിചയപ്പെടുത്തുക എന്നതാണ് ഈ സ്കൂളുകളുടെ ലക്ഷ്യമെന്ന് സേവാഭാരതി വ്യക്തമാക്കി. കശ്മീരിലെ യുവാക്കളിൽ ദേശീയതയുടെയും ദേശസ്‌നേഹത്തിന്റെയും വികാരം വളർത്തുന്നതിൽ ഈ സ്‌കൂളുകൾ പ്രധാന പങ്കുവഹിച്ചിട്ടുണ്ടെന്നും സേവാഭാരതി പറയുന്നു.