ഭിന്നശേഷി വിദ്യാർത്ഥിയെ മർദ്ദിച്ച സംഭവം;എസ്എഫ്ഐ പ്രവർത്തകരുടെമുൻകൂർ ജാമ്യാപേക്ഷ തള്ളി

തിരുവനന്തപുരം: യൂണിവേഴ്സിറ്റി കോളേജിലെ ഭിന്നശേഷി വിദ്യാർത്ഥിയെ ക്രൂരമായി ആക്രമിച്ച കേസിലെ പ്രതികളായ എസ്എഫ്ഐ പ്രവർത്തകരുടെ മുൻകൂർ ജാമ്യാപേക്ഷ തള്ളി. ഒന്നാം പ്രതി അമൽ, രണ്ടാം പ്രതി മിഥുൻ, മൂന്നാം പ്രതി അലൻ, നാലാം പ്രതി വിധു എന്നീ പ്രതികളുടെ മുൻകൂർ ജാമ്യാപേക്ഷയിലാണ് വിധി.തിരുവനന്തപുരം ആറാം അഡീഷ്ണൽ സെഷൻസ് കോടതിയാണ് മുൻകൂർ ജാമ്യാപേക്ഷ തള്ളിയത്.

ഇത്തരം കേസുകളിൽ മുൻകൂർ ജാമ്യം അനുവദിച്ചാൽ അത് സമൂഹത്തിൽ തെറ്റായ സന്ദേശം നൽകുമെന്ന് വ്യക്തമാക്കിയാണ് ജാമ്യാപേക്ഷ തള്ളിയത്. നേരത്തെ ജാമ്യ ഹർജിയിൽ വിധി വരുന്നത് വരെ പ്രതികളെ അറസ്റ്റ് ചെയ്യരുത് എന്ന് കോടതി നിർദ്ദേശിച്ചിരുന്നു. യൂണിവേഴ്സിറ്റി കോളേജിലെ രണ്ടാം വർഷ ബിഎ ഇസ്‌ലാമിക് ഹിസ്റ്ററി വിദ്യാർത്ഥിയായ മുഹമ്മദ് അനസിനെ ആണ് വിദ്യാർത്ഥികളുടെ മുന്നിൽ വെച്ച് എസ്എഫ്ഐ പ്രവർത്തകർ ക്രൂരമായി മർദിച്ചത്. പാർട്ടി പതാകകൾ സ്ഥാപിക്കാൻ മതിൽ കയറാൻ പ്രതികൾ അനസിനോട് നിർദ്ദേശിച്ചു, എന്നാൽ അവശത കാരണം അനസ് അതിന് തയ്യാറായില്ല . ഇത് അവരെ പ്രകോപിപ്പിച്ചതാണ് ആക്രമണത്തിലേക്ക് നയിച്ചത്.