“എസ്എഫ്ഐ ഗുണ്ടകളുടെ സംഘടന !” നിലപാട് ആവർത്തിച്ച് ഗവർണർ ; ഗസ്റ്റ് ഹൗസിന് സമീപം നടത്തിയ പ്രതിഷേധത്തെ തൃണവൽക്കരിച്ച് കാലിക്കറ്റ് സര്‍വകലാശാലയിലെ സെമിനാറില്‍ പങ്കെടുക്കുന്നു

എസ്എഫ്ഐ ഗുണ്ടകളുടെ സംഘടനയാണെന്നാർത്തിച്ച് ഗവര്‍ണര്‍ ആരിഫ് മുഹമ്മദ് ഖാന്‍. നൂറ് കണക്കിന് എസ്എഫ്ഐ പ്രവർത്തകർ ഗവർണർ താമസിച്ചിരുന്ന ഗസ്റ്റ് ഹൗസിന് സമീപം നടത്തിയ പ്രതിഷേധത്തെ തൃണവൽക്കരിച്ച് കാലിക്കറ്റ് സര്‍വകലാശാലയിലെ സെമിനാറില്‍ പങ്കെടുക്കാന്‍ വേദിയില്‍ കയറുന്നതിന് തൊട്ടുമുമ്പ് മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം.

“|കോഴിക്കോട് നഗരത്തില്‍ രണ്ടുമണിക്കൂറില്‍ കൂടുതല്‍ സമയം ഞാന്‍ ഉണ്ടായിരുന്നു. എന്തുകൊണ്ടാണ് ഒരാള്‍പോലും വരാതിരുന്നത്. തനിക്കെതിരെ സര്‍വകലാശാലയില്‍ പ്രതിഷേധിക്കുന്ന എസ്എഫ്ഐ പ്രവര്‍ത്തകരെ പോലീസ് സുരക്ഷയില്‍ മുഖ്യമന്ത്രിയാണ് അയക്കുന്നത്. അവര്‍ ഗുണ്ടകളാണ്. അവര്‍ വിദ്യാർത്ഥികളല്ല. എസ്എഫ്ഐയില്‍ മാത്രമാണോ വിദ്യാര്‍ഥികള്‍ ഉള്ളത്. എസ്എഫ്ഐ ഗുണ്ടകളുടെ സംഘടനയാണ്. ഇതാണ് അവര്‍ ചെയ്തുകൊണ്ടിക്കുന്നത്. അവരത് തുടരട്ടെ. ക്രിമിനലുകളും കൊലപാതകികളും അങ്ങനെയാണ്. അതിലെന്താണ് പ്രത്യേകത” – ഗവർണർ പറഞ്ഞു. സെമിനാറില്‍ പങ്കെടുത്തശേഷം അദ്ദേഹം ഇന്ന് രാത്രി ഏഴുമണിയോടെ തലസ്ഥാനത്തേക്ക് തിരിക്കും.