ഷാനിമോൾ ഉസ്മാൻ ഡെപ്യൂട്ടി സ്പീക്കർ ! വോട്ടെടുപ്പിൽ നിന്ന് മാറി നിന്ന് ബിജെപി എംഎൽഎമാർ

തിരുവനന്തപുരം :16-ാം കേരള നിയമസഭയുടെ ഡെപ്യൂട്ടി സ്പീക്കറായി യുഡിഎഫിലെ ഷാനിമോൾ ഉസ്മാനെ തിരഞ്ഞെടുത്തു.39 വർഷത്തിന് ശേഷമുള്ള സഭയുടെ ഈ നിർണ്ണായക പദവിയിലേക്ക് ഒരു വനിത കടന്നുവരുന്നത്. 99 വോട്ടുകൾ നേടിയാണ് ഷാനിമോൾ ഉസ്മാൻ ഡെപ്യൂട്ടി സ്പീക്കർ പദവി ഉറപ്പിച്ചത്. എൽഡിഎഫ് സ്ഥാനാർത്ഥിയായ മുഹമ്മദ് മുഹസിന് 34 വോട്ടുകളാണ് ലഭിച്ചത്. ആകെ 35 അംഗങ്ങളുള്ള എൽഡിഎഫ് നിരയിൽ ഒരാൾ വോട്ടെടുപ്പ് സമയത്ത് സഭയിൽ ഹാജരായിരുന്നില്ല. സ്പീക്കർ തിരുവഞ്ചൂർ രാധാകൃഷ്ണൻ വോട്ട് രേഖപ്പെടുത്താതിരുന്നപ്പോൾ, യുഡിഎഫ് എംഎൽഎമാരായ ആബിദ് ഹുസൈൻ തങ്ങൾ, സന്ദീപ് വാര്യർ എന്നിവരും ഇടത് എംഎൽഎ സി.കെ. ഹരീന്ദ്രനും സഭയിലെത്തിയില്ല. ബിജെപിയുടെ മൂന്ന് എംഎൽഎമാരും വോട്ടെടുപ്പിൽ നിന്ന് പൂർണ്ണമായി വിട്ടുനിൽക്കുകയാണുണ്ടായത്.

2019-ൽ എ.എം. ആരിഫ് ലോക്സഭയിലേക്ക് തിരഞ്ഞെടുക്കപ്പെട്ടതിനെ തുടർന്ന് അരൂരിൽ നടന്ന ഉപതിരഞ്ഞെടുപ്പിലൂടെയാണ് ഷാനിമോൾ ഉസ്മാൻ ആദ്യമായി നിയമസഭയിലെത്തുന്നത്. എന്നാൽ 2021-ൽ ദലീമയിലൂടെ എൽഡിഎഫ് ഈ മണ്ഡലം തിരിച്ചുപിടിച്ചു. ഇത്തവണ 9324 വോട്ടിന്റെ വൻ ഭൂരിപക്ഷത്തോടെയാണ് അവർ വിജയിച്ചത്.