എൻസിപി മുഴുവനായും എൻഡിഎയിലേക്കോ ?കോൺഗ്രസിന്റെയും ശിവസേന താക്കറെ വിഭാഗത്തിന്റെയും മുന്നറിയിപ്പുകൾക്ക് പുല്ലുവില !പ്രധാനമന്ത്രി നരേന്ദ്ര മോദിയുമായി വേദി പങ്കിട്ട് ശരദ് പവാർ

പൂനെ : പ്രതിപക്ഷ മഹാ സഖ്യത്തിനെ ഞെട്ടിച്ച് കോൺഗ്രസിന്റെയും ശിവസേന താക്കറെ വിഭാഗത്തിന്റെയും മുന്നറിയിപ്പുകൾ കാറ്റിൽ പറത്തിക്കൊണ്ട് പ്രധാനമന്ത്രി നരേന്ദ്ര മോദിയുമായി വേദി പങ്കിട്ട് പ്രതിപക്ഷ നേതൃനിരയിലെ മുതിർന്ന നേതാവായ ശരദ് പവാർ. പ്രധാനമന്ത്രി പങ്കെടുക്കുന്ന പരിപാടികളിൽ നിന്ന് വിട്ടുനിൽക്കുമെന്ന നിലപാട് പ്രതിപക്ഷ മഹാസഖ്യത്തിലെ കക്ഷികൾ സ്വീകരിച്ചിരിക്കെയാണ് ശരദ് പവാർ മോദിയുമായി പൂനെയിൽ വേദി പങ്കിട്ടത്.

യോഗം തുടങ്ങുന്നതിന് മുൻപ് ശരദ് പവാറിന് അടുത്തെത്തി നരേന്ദ്ര മോദി അദ്ദേഹവുമായി സൗഹൃദസംഭാഷണം നടത്തി. ലോക്മാന്യ തിലക് സ്മാരക മന്ദിർ ട്രസ്റ്റ് സംഘടിപ്പിച്ച പരിപാടിയിൽ മുഖ്യാതിഥിയായിട്ടായിരുന്നു ശരദ് പവാർ എത്തിയിരുന്നത്. പ്രധാനമന്ത്രി നരേന്ദ്ര മോദിക്കായിരുന്നു ലോക്മാന്യ തിലക് ദേശീയ പുരസ്കാരം ലഭിച്ചത്. മഹാരാഷ്ട്ര മുഖ്യമന്ത്രി ഏക്നാഥ് ഷിൻഡെ, ബിജെപി ഉപമുഖ്യമന്ത്രി ദേവേന്ദ്ര ഫഡ്നവിസ്, അടുത്തിടെ എൻസിപി പിളർത്തി ബിജെപിയുമായി കൈകോർത്ത ശരദ് പവാറിന്റെ അനന്തിരവൻ അജിത് പവാർ എന്നിവരും വേദിയിൽ സന്നിഹിതരായിരുന്നു.