സിദ്ധാർത്ഥന്റെ മരണം ! പിതാവ് ജയപ്രകാശിന്റെ മൊഴിയെടുക്കാൻ സിബിഐ ! ചൊവ്വാഴ്ചയെത്താൻ നിർദേശം

എസ്എഫ്ഐ നേതാക്കളുടെ ആൾക്കൂട്ട വിചാരണയ്ക്കും ക്രൂര മർദ്ദനത്തിനുമിരയായി പൂക്കോട് വെറ്ററിനറി കോളേജ് വിദ്യാർത്ഥി സിദ്ധാര്‍ഥന്റെ കൊല്ലപ്പെട്ട സംഭവത്തിൽ സിബിഐ ,സിദ്ധാര്‍ഥന്റെ പിതാവ് ജയപ്രകാശിന്റെ മൊഴി എടുക്കും. ഇതിനായി ചൊവ്വാഴ്ച വയനാട്ടിലെത്താനാണ് നിർദേശം. കൽപ്പറ്റ പോലീസ് വഴി വിവരം വീട്ടുകാരെ അറിയിച്ചിട്ടുണ്ട്.

സിബിഐ അന്വേഷണത്തിനായി കേന്ദ്രസർക്കാർ വിജ്ഞാപനമിറങ്ങിയതിന് പിന്നാലെ സിബിഐ സംഘം വയനാട്ടിലെത്തിയിരുന്നു. സിബിഐ എസ്പി ഉള്‍പ്പെടെയുള്ള നാലംഗ സംഘമാണ് വയനാട്ടിലെത്തിയത്. ഇവര്‍ ജില്ലാ പോലീസ് മേധാവിയും അന്വേഷണ ഉദ്യാഗസ്ഥനായിരുന്ന കല്‍പ്പറ്റ ഡിവൈഎസ്പിയുമായും കൂടിക്കാഴ്ച നടത്തി.

ഒരു എസ്പിയും ഡിവൈഎസ്പിയും രണ്ട് ഇൻസ്പെക്ടർമാരുമടങ്ങുന്നതാണ് അന്വേഷണസംഘമെന്നാണ് ലഭിക്കുന്ന വിവരം. കേസുമായി ബന്ധപ്പെട്ട പ്രാഥമിക വിവരശേഖരമാണ് നടത്തിയത്. ഫയലുകൾ പരിശോധിക്കുകയും മറ്റു വിവരങ്ങൾ തേടുകയുമാണ് അന്വേഷണസംഘം ചെയ്തതെന്നാണ് സൂചന. രണ്ട് ഉദ്യോ​ഗസ്ഥർ കൂടി അന്വേഷണസംഘത്തിൽ ചേരുമെന്നും റിപ്പോർട്ടുകളുണ്ട്.