തന്നെ പാർട്ടിയിൽ നിന്ന് പുറത്താക്കിയതിന്റെ കാരണം വിശദീകരിക്കണമെന്ന് സിമി റോസ് ബെൽ ജോൺ ! സിപിഎം ഗൂഢാലോചനയെങ്കിൽ തെളിവ് പുറത്തു വിടാനും വെല്ലുവിളി

കൊച്ചി : തന്നെ കോൺഗ്രസിന്റെ പ്രാഥമിക അംഗത്വത്തിൽ നിന്ന് പുറത്താക്കിയതിനു പിന്നിലെ കാരണം നേതൃത്വം വിശദീകരിക്കണമെന്ന് ആവശ്യപ്പെട്ട് മുൻ എഐസിസി അംഗം സിമി റോസ് ബെൽ ജോൺ. ലതിക സുഭാഷ്, പദ്മജ എന്നിവരെ അപമാനിച്ചു വിട്ടതാണെന്നും പാർട്ടിയിൽ അന്തസ്സും ആഭിജാത്യവുമുള്ള സ്ത്രീകൾക്ക് കേരളത്തിലെ കോൺഗ്രസിൽ പ്രവർത്തിക്കാൻ പറ്റില്ലെന്നും സിമി റോസ് ബെൽ ജോൺ തുറന്നടിച്ചു. തന്റെ വെളിപ്പെടുത്തൽ സിപിഎം ഗൂഢാലോചന എന്ന് ആരോപിക്കുകയാണെന്നും എങ്കിൽ ഇതിന് തെളിവ് പുറത്തു വിടണമെന്നും അവർ വെല്ലുവിളിച്ചു.

“പാർട്ടിയിൽ അന്തസ്സും ആഭിജാത്യവുമുള്ള സ്ത്രീകൾക്ക് കേരളത്തിലെ കോൺഗ്രസിൽ പ്രവർത്തിക്കാൻ പറ്റില്ല. ഹൈബിയുടെ യോഗ്യത അല്ലല്ലോ. ഈടന്റെ മകൻ ആയത് കൊണ്ടല്ലേ എംപി ആക്കിയത്. എന്ത് കൊണ്ട് പദ്മജയ്ക്ക് കൊടുത്തില്ല?. പദ്മജയെ തോല്പിച്ചതാണ്. ദീപ്തി മേരി വർഗീസിനെ പുറത്താക്കി, 3 മാസത്തിൽ അവർ തിരിച്ചെത്തി. രാഹുൽ ഗാന്ധിയെ വിമർശിച്ച മഹേഷ്‌ എംഎൽഎയ്ക്ക് ഒന്നും സംഭവിച്ചില്ല. കാരണം അയാൾ പുരുഷനായത് കൊണ്ടാണ്. വിധവയായ തന്നെ തകർക്കാൻ ശ്രമിക്കുകയാണെന്നും സിമി റോസ് ബെൽ ജോൺ പറഞ്ഞു. വിഡി സതീശൻ വന്ന വഴി മറക്കരുത്. പഴയ സ്കൂട്ടറിൽ മണി ചെയ്യിൻ തട്ടിപ്പ് നടത്താൻ നഗരത്തിൽ വന്ന കാലം ഉണ്ടായിരുന്നു. കോൺഗ്രസിന്റെ തുടർഭരണം നഷ്ടപ്പെടുത്തിയ ആളാണ് സതീശൻ”- സിമി റോസ് ബെൽ ജോൺ പറഞ്ഞു.

സ്വകാര്യ ടി.വി ചാനലിന് നൽകിയ അഭിമുഖത്തിൽ പ്രതിപക്ഷ നേതാവിനെയും കോൺഗ്രസിലെ വനിതാ നേതാക്കളെയും വിമർശിച്ചതിന് പിന്നാലെയാണ് മുൻ എഐസിസി അംഗവും പിഎസ്സി അംഗവുമായ സിമി റോസ് ബെൽ ജോണിനെ കോൺഗ്രസിൽ നിന്ന് പുറത്താക്കിയത്.

സ്വകാര്യ ടിവി ചാനലിന് നല്‍കിയ അഭിമുഖത്തില്‍, പ്രതിപക്ഷനേതാവ് വി ഡി സതീശന്റെ നേതൃത്വത്തിലുള്ള പവര്‍ ഗ്രൂപ്പ് പ്രവര്‍ത്തിക്കുന്നുവെന്നും അവരുടെ ഗുഡ് ബുക്കില്‍ ഇടംപിടിക്കാത്ത വനിതാപ്രവര്‍ത്തകരെ പരിഹസിച്ച് മാറ്റിനിര്‍ത്തുകയാണെന്നും സിമി ആരോപിച്ചിരുന്നു. പിന്നാലെയാണ് സിമിക്കെതിരെ കോണ്‍ഗ്രസ് നടപടി സ്വീകരിച്ചത്‌. സിമി റോസ്ബെല്‍ ജോണിനെ കെപിസിസി പ്രസിഡന്റ് കെ സുധാകരന്‍ എംപി പുറത്താക്കിയതായി കെപിസിസി ജനറല്‍ സെക്രട്ടറി എം ലിജു അറിയിച്ചു.

പ്രസ്താവന വിവാദമായതിന് പിന്നാലെ കെപിസിസി രാഷ്ട്രീയകാര്യ സമിതിയിലേയും കെപിസിസി ഭാരവാഹികളിലേയും വനിതാ നേതാക്കളും മഹിളാ കോൺഗ്രസ് സംസ്ഥാന അദ്ധ്യക്ഷയും അടക്കമുള്ളവർ സിമി റോസ് ബെൽ ജോണിനെതിരെ നടപടിയെടുക്കണമെന്ന് കെപിസിസി നേതൃത്വത്തിന് പരാതി നൽകിയിരുന്നു. സിമി റോസ് ബെൽ ജോണിന്റെ പ്രവൃത്തി ഗുരുതരമായ അച്ചടക്ക ലംഘനമാണെന്ന് പ്രഥമ ദൃഷ്ട്യാ പാർട്ടിക്ക് ബോധ്യപ്പെട്ടതിനാലാണ് അച്ചടക്ക നടപടിയെടുത്തെന്നും കെപിസിസി അറിയിച്ചു.