സ്വർണകടത്ത്; മുഖ്യസൂത്രധാരൻ ശിവശങ്കർ തന്നെ; സ്വപ്ന വെറും മുഖം മാത്രം

കൊച്ചി : സ്വർണക്കടത്ത് കേസിൽ ശിവശങ്കർ തന്നെയാണ് മുഖ്യ സൂത്രധാരനെന്നും, സ്വപ്ന സുരേഷ് വെറും മുഖം മാത്രമാണെന്നും, ഹൈക്കോടതിയിൽ എൻഫോഴ്സ്മെന്റ് ഡയറക്ടറേറ്റിന്റെ മൊഴി. കേസിൽ സ്വപ്നയെ പൂർണ്ണമായും നിയന്ത്രിച്ചിരുന്നതും ഇടപാടുകളുടെ എല്ലാ നേട്ടവും ശിവശങ്കറിലേക്കാണ് എത്തിനിൽക്കുന്നതെന്നും ഇ ഡി വ്യക്തമാക്കി. അറസ്റ്റിനുള്ള സാധ്യത കണ്ടു മുൻകൂർ ജാമ്യം തേടി മുൻ ഐ.ടി സെക്രട്ടറി എം.ശിവശങ്കർ നൽകിയ ഹർജിയിന്മേലുള്ള വാദത്തിലായിരുന്നു ഇഡി ഇക്കാര്യം വ്യക്തമാക്കിയത്

സ്വർണ്ണം കടത്തിയപ്പോൾ ശിവശങ്കർ വഹിച്ചിരുന്ന പദവിയുടെ ഔദ്യോഗിക അധികാരം കണക്കിലെടുത്താണ് ഈ കാര്യങ്ങൾ പറയുന്നതെന്നും അഡീഷണൽ സോളിസിറ്റർ ജനറൽ എസ്ബി രാജു കോടതിയിൽ മൊഴി നൽകി.

രണ്ടു മണിക്കൂർ നീണ്ടു നിന്ന വാദം കേട്ട ശേഷം, ജസ്റ്റിസ് അശോക് മേനോൻ ഹർജിയിൽ ഒക്ടോബർ 28ന് വിധിപറയുമെന്ന് പ്രഖ്യാപിച്ചു. അതുവരെയും ശിവശങ്കറെ അറസ്റ്റ് ചെയ്യരുതെന്ന് കോടതി നിർദ്ദേശിച്ചിട്ടുണ്ട്. അതേസമയം ശിവശങ്കർ അന്വേഷണവുമായി സഹകരിക്കുന്നില്ലെന്നും കസ്റ്റംസ് കോടതിയിൽ ചൂണ്ടിക്കാട്ടിയിട്ടുണ്ട്.