തിരുവോണ പുലരിക്കായി ഒരുങ്ങി ശ്രീ പത്മനാഭ സന്നിധി ! ചരിത്ര പ്രസിദ്ധമായ ഓണവില്ല് സമർപ്പണത്തോടെ ആചാര പരിപാടികൾക്ക് തുടക്കമാകും ; തിരുവോണ നാളിൽ ക്ഷേത്രത്തിൽ എത്തുന്ന ഭക്തജനങ്ങൾക്ക് വിഭവസമൃദ്ധമായ ഓണസദ്യയും

ശ്രീപത്മനാഭസ്വാമി ക്ഷേത്രത്തിൽ തിരുവോണം പ്രമാണിച്ചുള്ള വിപുലമായ ആചാര പരിപാടികൾക്ക് നാളെ രാവിലെ അഞ്ച് മണിയോടെ തുടക്കമാകും. രാവിലെ അഞ്ചുമണിക്ക് ശേഷം ചരിത്ര പ്രസിദ്ധമായ ഓണവില്ല് സമർപ്പണം നടക്കും.

കിഴക്കേ നടയിൽ ഒരുക്കുന്ന വർണ്ണാഭമായ അത്തപ്പൂക്കളം രാവിലെ എട്ടുമണിക്ക് പൂയ്യം തിരുനാൾ ഗൗരി പാർവതി ഭായി അശ്വതി തിരുനാൾ ഗൗരി ലക്ഷ്മിഭായി അവിട്ടം തിരുനാൾ ആദിത്യ വർമ്മ എന്നിവർ ചേർന്ന് നിലവിളക്ക് കൊളുത്തി ഉദ്ഘാടനം ചെയ്യും. ക്ഷേത്രത്തിന്റെ അകത്ത് നാടകശാല മുഖപ്പിലും അത്തപ്പൂക്കളം ഒരുക്കും. അന്നേദിവസം ക്ഷേത്രത്തിൽ എത്തുന്ന ഭക്തജനങ്ങൾക്ക് വിഭവസമൃദ്ധമായ ഓണസദ്യയും ഒരുക്കും.

ചിങ്ങമാസത്തിലെ തിരുവോണ നക്ഷത്രം ശ്രീപത്മനാഭസ്വാമിയുടെ തിരുനാൾ കൂടി ആയതിനാൽ ശീവേലി പുരയിൽ മാലകെട്ടി അലങ്കരിച്ച രാത്രി എട്ടുമണിക്ക് അനന്ത വാഹനത്തിൽ പൊന്നും ശീവേലിയും ഉണ്ടായിരിക്കും.