ശ്രീനഗറില്‍ വീണ്ടും ഏറ്റുമുട്ടല്‍; 3 ഭീകരരെ വധിച്ചു

ശ്രീനഗര്‍: ശ്രീനഗറിലെ പാന്ത ചൗക്കില്‍ വീണ്ടും ഏറ്റുമുട്ടൽ. മൂന്ന് ഭീകരരെ സൈന്യം വധിച്ചു. മരിച്ചവരിലൊരാള്‍ ജെയ്‌ഷെ മുഹമ്മദ് പ്രവര്‍ത്തകനാണ്. സെവാന്‍ ആക്രമണത്തില്‍ ഉൾപ്പെട്ടിട്ടുള്ളയാളാണ്.

”മരിച്ചവരില്‍ ഒരാളെ തിരിച്ചറിഞ്ഞു. ജെയ്‌ഷെ മുഹമ്മദ് പ്രവര്‍ത്തകന്‍ സുഹൈല്‍ അഹ്മദ് റാത്തറാണ് മരിച്ചത്. ഇയാള്‍ സെവാന്‍ സായുധാക്രമണത്തില്‍ പങ്കെടുത്തയാളാണ് എന്ന് കശ്മീര്‍ പോലിസ് ഐജി വിജയ് കുമാര്‍ പറഞ്ഞു. പരസ്പരമുള്ള ഏറ്റുമുട്ടലില്‍ മൂന്ന് പോലിസുകാര്‍ക്കും ഒരു സിആര്‍പിഎഫ് ജവാനും പരിക്കേറ്റു. പരിക്കേറ്റവരെ ആശുപത്രിയില്‍ പ്രവേശിപ്പിച്ചു. വ്യാഴാഴ്ച രാത്രിയാണ് ഏറ്റുമുട്ടല്‍ നടന്നത്.

ഈ വര്‍ഷം നുഴഞ്ഞുകയറ്റത്തില്‍ കുറവുണ്ടായിട്ടുണ്ടെന്ന് 15 കോര്‍പ്‌സ് കമാന്‍ഡിങ് ജനറല്‍ ഓഫിസര്‍ ലഫ്റ്റനന്‍ര് ജനറല്‍ ജി പി പാണ്ഡെ പറഞ്ഞു. സായുധര്‍ 15-16 വയസ്സുകാരെയാണ് പുതുതായി റിക്രേൂട്ട് ചെയ്യുന്നതെന്നും അദ്ദേഹം പറഞ്ഞു.