വടക്കുപടിഞ്ഞാറന്‍ പാകിസ്ഥാനിൽ സുന്നി – ഷിയ കലാപം!കൊല്ലപ്പെട്ടവരുടെ എണ്ണം 36 ആയി ; ഇരു വിഭാഗങ്ങളും റോക്കറ്റ് ഷെല്ലുകളടക്കമുള്ള മാരകായുധങ്ങൾ ഉപയോഗിക്കുന്നതായി റിപ്പോർട്ട്

വടക്കുപടിഞ്ഞാറന്‍ പാകിസ്ഥാനിലെ ഗോത്രവര്‍ഗ മേഖലയായ ഖൈബര്‍ പഖ്തുന്‍ഖ്വയില്‍ കഴിഞ്ഞ ആറ് ദിവസമായി തുടരുന്ന ഷിയ- സുന്നി സംഘർഷത്തിൽ മരിച്ചവരുടെ എണ്ണം 36 ആയി. 166 പേര്‍ക്ക് പരിക്കേറ്റു. അനൗദ്യോഗിക കണക്കുകൾ പറയുന്നത് ഇതിലുമേറെപ്പേർ കൊല്ലപ്പെട്ടുവെന്നാണ്. സമൂഹ മാദ്ധ്യമങ്ങളില്‍ പ്രചരിക്കുന്നത് 400 ഷിയ മുസ്ലിങ്ങള്‍ കൊല്ലപ്പെട്ടുവെന്നാണെങ്കിലും ഇതിൽ സ്ഥിരീകരണമില്ല.

കുറം ജില്ലയിലെ ഖൈബര്‍ പഖ്തുന്‍ഖ്വ മേഖല അഫ്ഗാനിസ്ഥാന്‍ അതിര്‍ത്തിയാണ്. ഗോത്രവര്‍ഗ വിഭാഗങ്ങള്‍ തമ്മില്‍ ഇവിടെ നിരന്തരം സംഘർഷമുണ്ടാകാറുണ്ട്. പരിക്കേറ്റ് ചികിത്സയിലുള്ള പലരുടെയും നില അതീവ ഗുരുതരമായതിനാൽ മരണനിരക്ക് ഇനിയും ഉയരുമെന്ന് കുറം ഡെപ്യൂട്ടി കമ്മിഷണര്‍ ജാവേദുല്ല മെഷൂദ് പറഞ്ഞു. ഗോത്രവിഭാഗക്കാര്‍ തങ്ങളുടെ താമസസ്ഥലം വിട്ടുപോവുകയാണ്.

സംഘര്‍ഷം മറ്റു മേഖലകളിലേക്കും വ്യാപിക്കുന്നതായിട്ടാണ് റിപ്പോര്‍ട്ടുകള്‍ പറയുന്നത്. മോര്‍ട്ടാര്‍ ഷെല്ലുകളും റോക്കറ്റ് ഷെല്ലുകളും ഉള്‍പ്പെടെയുള്ള മാരകമായ ആയുധങ്ങളാണ് ഇരുവിഭാഗം ഉപയോഗിക്കുന്നത്. പരസ്പരമുള്ള വെടിവയ്‌പ്പില്‍ നിരവധി പേര്‍ക്കാണ് പരിക്കേറ്റത്. മേഖലയിലെ വിദ്യാഭ്യാസ സ്ഥാപനങ്ങള്‍ക്കും സര്‍ക്കാര്‍, സ്വകാര്യ സ്ഥാപനങ്ങള്‍ക്കും അവധി പ്രഖ്യാപിച്ചിരിക്കുകയാണ്. പ്രധാന റോഡുകളിലെ ഗതാഗതം നിരോധിച്ചു. ക്രമസമാധാന നില ഉറപ്പുവരുത്തുന്നതിനായി വന്‍ സുരക്ഷാസേനയെയാണ് മേഖലയില്‍ വിന്യസിച്ചിരിക്കുന്നത്.