രണ്ടു തലമുറകളുടെ സംഗമം; വരുന്നു ‘പാപ്പൻ’; സുരേഷ് ഗോപിയുടെ 252-ാം ചിത്രം റിലീസിനൊരുങ്ങുന്നു

സുരേഷ് ഗോപിയുടെ 252-ാം ചിത്രം റിലീസിനൊരുങ്ങുന്നു. തീയറ്ററുകൾ അടക്കിവാഴാൻ ‘പാപ്പൻ’ (Paappan Movie) ഉടനെത്തുമെന്നാണ് വിവരം. അതേസമയം മലയാള സിനിമയിൽ രണ്ടു തലമുറകളുടെ സംഗമമാണ് ജോഷി സംവിധാനം ചെയ്യുന്ന പുതിയ സുരേഷ് ഗോപി ചിത്രമായ ‘പാപ്പൻ’. സംവിധായകൻ ജോഷിക്കൊപ്പം ക്രിയേറ്റീവ് ഡയറക്ടറായി മകൻ അഭിലാഷ് ജോഷിയുണ്ട്. ഏബ്രഹാം മാത്യു മാത്തൻ എന്ന സുരേഷ് ഗോപിയുടെ നായക വേഷത്തിനൊപ്പം മകൻ ഗോകുൽ സുരേഷുണ്ട്. ഇരുവരും ഒരുമിച്ചഭിനയിക്കുന്ന ആദ്യ ചിത്രമാണിത്.

ചിത്രവുമായി ബന്ധപ്പെട്ട പുതിയ വാർത്തകൾക്ക് കാതോർത്തിരിക്കുകയായിരുന്നു സിനിമാ പ്രേമികൾ. ഇപ്പോഴിതാ ചിത്രം റിലീസിനൊരുങ്ങുകയാണെന്നും ഉടൻ തന്നെ പ്രേക്ഷകരിലേയ്‌ക്ക് എത്തുമെന്നുമാണ് റിപ്പോർട്ടുകൾ പുറത്തുവന്നിരിക്കുന്നത്. ഡേവിഡ് കാച്ചപ്പിള്ളി നിർമ്മിക്കുന്ന ചിത്രത്തിന്റെ തിരക്കഥയൊരുക്കുന്നത് ആർജെ ഷാനാണ്. ജോഷിയും സുരേഷ് ഗോപിയും ഏഴ് വർഷങ്ങൾക്ക് ശേഷം ഒന്നിക്കുന്ന ചിത്രമാണ് പാപ്പൻ. ക്രൈം ത്രില്ലറായാണ് ചിത്രം ഒരുക്കിയിരിക്കുന്നത്. ലേലം, വാഴുന്നോർ, ക്രിസ്ത്യൻ ബ്രദേഴ്സ് ഉൾപ്പെടെ നിരവധി സൂപ്പർ ഹിറ്റുകൾ ഇരുവരുടേയും കൂട്ടുകെട്ടിൽ പിറന്നിട്ടുണ്ട്.
സണ്ണിവെയ്ൻ, നൈല ഉഷ, നീത പിള്ള, ആശ ശരത്, കനിഹ, ചന്ദുനാഥ്, വിജയരാഘവൻ, ടിനി ടോം, ഷമ്മി തിലകൻ, തുടങ്ങി വൻ താര നിരയാണ് ചിത്രത്തിൽ അണിനിരക്കുന്നത്.