കാലടി പാലത്തിലെ ഗതാഗതക്കുരുക്കിൽപ്പെട്ട് സുരേഷ്‌ഗോപി;യാത്രാ ദുരിതം പങ്കുവച്ച് നാട്ടുകാർ; കേന്ദ്രമന്ത്രി യാത്ര തുടർന്നത് പാലം പരിശോധിച്ച് പൊതുമരാമത്ത് വകുപ്പിൽ പരാതിയും നൽകിയ ശേഷം

കൊച്ചി:കോട്ടയത്തുനിന്ന് തൃശൂരിലേക്കുള്ള യാത്രയ്ക്കിടെ എംസി റോഡിൽ കാലടി പാലത്തിലെ കുഴി മൂലമുണ്ടായ ഗതാഗതക്കുരുക്കിൽപ്പെട്ട് കേന്ദ്രമന്ത്രി സുരേഷ്‌ഗോപി. ഇന്ന് ഉച്ചയ്ക്ക് പന്ത്രണ്ട് മണിയോടെയാണ് കേന്ദ്രമന്ത്രി ഈ വഴി എത്തിയത്. കനത്ത മഴയുണ്ടായിരുന്ന സമയമായതിനാല്‍ വലിയ ഗതാഗതകുരുക്കാണ് പാലത്തില്‍ അനുഭവപ്പെട്ടിരുന്നത്. ഇതോടെ സുരേഷ് ഗോപി വാഹനത്തില്‍നിന്നിറങ്ങി പാലത്തിൽ പരിശോധന നടത്തി. പിന്നാലെ പൊതുമരാമത്ത് വകുപ്പിലെ മുതിര്‍ന്ന ഉദ്യോഗസ്ഥരെ വിളിച്ച് സുരേഷ് ഗോപി പരാതി അറിയിക്കുകയും ചെയ്തു. നിരവധി നാട്ടുകാരാണ് കേന്ദ്രമന്ത്രിയോട് പരാതി പറയാനെത്തിയത്.

എം.സി റോഡിലെ ഏറ്റവും തിരക്കേറിയ പാലമാണ് കാലടി പാലം. നെടുമ്പാശ്ശേരി വിമാനത്താവളത്തിലേക്കുള്‍പ്പടെ പ്രതിദിനം ആയിരക്കണക്കിന് വാഹനങ്ങള്‍ സഞ്ചരിക്കുന്ന പാതയാണിത്. 20 മിനിറ്റ് വേണ്ട യാത്ര ഒരു മണിക്കൂറോളമെടുത്ത് പൂര്‍ത്തിയാക്കേണ്ട സ്ഥിതിയാണ് ഇവിടെ നിലവിലുള്ളതെന്നാണ് നാട്ടുകാരുടെ പരാതി