കോഴിക്കോട് ഭീകരാക്രമണക്കേസിൽ പ്രതി പിടിയിൽ ! ചുരുളഴിക്കേണ്ടത് ഒട്ടനവധി ദുരൂഹതകൾക്ക്

ദില്ലി : കോഴിക്കോട് ഭീകരാക്രമണക്കേസിൽ പിടിയിലായ ഷാറൂഖ് സെയ്ഫി ദില്ലി ഷഹീൻബാഗ് സ്വദേശിയാണെന്ന് സ്ഥിരീകരിച്ചു. ഉത്തർപ്രദേശിലെ നോയ്ഡയിൽ പിതാവിനോടൊപ്പം തടി ഉരുപ്പടികളും ഗൃഹോപകരണങ്ങളും ഉണ്ടാക്കിവിൽക്കുന്ന ജോലിയിലായിരുന്നു ഇയാൾക്ക്. ഇനി അറിയാനുള്ളത് എന്തിനാണ് ഇയാൾ ട്രെയിനിലെ ആക്രമണത്തിന് മുതിർന്നത് എന്നതാണ് . നോയിഡയിൽ ജോലിചെയ്തിരുന്ന ഇയാൾ എന്തിന് കേരളത്തിൽ എത്തിയെന്നത് അടക്കമുള്ള വിവരങ്ങളും പുറത്ത് വരേണ്ടിയിരിക്കുന്നു.

ഇന്നലെ പ്രതിയുടെ വസതിയിൽ പൊലീസ് റെയ്ഡ് നടത്തിയിരുന്നു. ഇയാളെ മാർച്ച് 31 മുതൽ കാണാനില്ലെന്ന് പിതാവ് ഫക്രുദ്ദീൻ സെയ്ഫി കഴിഞ്ഞദിവസം വെളിപ്പെടുത്തിയിരുന്നു. കാണാതാകുന്നതിനു മുൻപ് ഇയാളുമായി ബന്ധപ്പെട്ടിരുന്ന ഫോൺ നമ്പറുകൾ ഉൾപ്പെടെ പരിശോധിച്ച ശേഷമാണ് ദില്ലി പൊലീസ് ഷഹീൻ ബാഗിലെ വസതിയിൽ എത്തിയത്.

തിങ്കളാഴ്ച ഉച്ചയോടെയാണ് പ്രതി നോയിഡ സ്വദേശിയെന്ന വിവരം പൊലീസ് പങ്കുവെച്ചത്. ട്രാക്കിൽ നിന്ന് ലഭിച്ച ബാഗിലുണ്ടായിരുന്ന ഫോണിൽ സിം കാർഡ് ഉണ്ടായിരുന്നില്ല എങ്കിലും ഫോണിന്റെ IMEA കോഡ് പരിശോധിച്ചതിൽ നിന്നാണ് ഉടമസ്ഥൻ നോയിഡ സ്വദേശിയെന്ന സൂചന ലഭിച്ചത്.

അതേസമയം മഹാരാഷ്ട്ര എടിഎസ് പിടികൂടിയ സെയ്ഫിയെ കേരള പൊലീസിന് കൈമാറിയിട്ടുണ്ട്. പ്രതിയുടെ അറസ്റ്റ് കേന്ദ്ര റെയിൽവേ മന്ത്രി അശ്വനി വൈഷ്ണവ് സ്ഥിരീകരിച്ചു. രത്നഗിരിയിൽ നിന്നാണ് പ്രതിയെ പിടികൂടിയത്.ഇയാൾക്ക് ട്രെയിനിൽ കണ്ട ആളുമായി രൂപസാദൃശ്യമുണ്ടെന്ന് സാക്ഷി ലതീഷ് വെളിപ്പെടുത്തിയിരുന്നു. പൊലീസ് പുറത്ത് വിട്ട ചിത്രത്തിൽ പ്രതി സെയ്ഫിയുടെ മുഖത്ത് പൊള്ളലേറ്റ പാടുകളുമുണ്ട്.