ആക്രിക്കടയിൽ മോട്ടർ വിൽക്കാനെത്തിയുണ്ടായ തർക്കം അവസാനിച്ചത് കത്തിക്കുത്തിൽ;കടയുടമയെയും സഹായിയെയും കയ്യേറ്റം ചെയ്ത പ്രതികൾ പിടിയിൽ

ആലപ്പുഴ: മണ്ണഞ്ചേരിയിൽ ആക്രിക്കട ഉടമയേയും അവരുടെ സഹായിയായ അന്യ സംസ്ഥാന തൊഴിലാളിയെയും കയ്യേറ്റം ചെയ്ത പ്രതികൾ പോലീസ് പിടിയിൽ.സനില്‍ (35),അരുണ്‍, നിജാസ് (26) എന്നിവരെയാണ് മണ്ണഞ്ചേരി പൊലീസ് അറസ്റ്റ് ചെയ്തത്.പ്രതിയായ നിജാസ് ആലപ്പുഴ നോർത്ത്, ആലപ്പുഴ സൗത്ത്, മണ്ണഞ്ചേരി എന്നീ പോലീസ് സ്റ്റേഷനുകളിൽ മോഷണ കേസ്സുകൾ ഉൾപ്പെടെ ഏഴ് കേസ്സുകളിൽ പ്രതിയാണ്.പ്രതികളായ സനിലിനും അരുണിനും നിരവധി സ്റ്റേഷനുകളിൽ കേസുകൾ ഉള്ളതായി പോലീസ് വ്യക്തമാക്കി.

ഷൗഹിദ് എന്നയാൾ നടത്തുന്ന ആക്രി കടയിൽ വിൽക്കാൻ കൊണ്ടു ചെന്ന മോട്ടോർ എടുക്കാത്തതിനെ തുടര്‍ന്ന് കട ഉടമയെ അസഭ്യം പറയുകയും അവിടെ ജോലി ചെയ്തിരുന്ന അന്യസംസ്ഥാന തൊഴിലാളിയെ കത്തി കൊണ്ട് കുത്തിയതിനുശേഷം പ്രതികൾ കടന്ന് കളയുകയുമായിരുന്നു. പിന്നീട് പൊലീസ് 24 മണിക്കൂറിനകം പ്രതികളെ പിടികൂടി അറസ്റ്റ് ചെയ്യുകയായിരുന്നു. അറസ്റ്റ് ചെയ്ത പ്രതികളെ കോടതിയിൽ ഹാജരാക്കിയ ശേഷം റിമാൻഡ് ചെയ്തു.