വില്ലനായി വീണ്ടും സെൽഫി : ഒരു കുടുംബത്തിലെ നാലു പേർ മുങ്ങി മരിച്ചു

തമിഴ്നാട്: സെൽഫി എടുക്കുന്നതിനിടയിൽ വെള്ളത്തിൽ വീണ് ഒരു കുടുംബത്തിലെ നാലു പേർ മരിച്ചു. തമിഴ്‌നാട്ടിലെ കൃഷ്‌ണഗിരി ജില്ലയിലെ മരമ്പട്ടിയിലെ പംബാരു അണക്കെട്ടിലാണ് സംഭവം. ഒരു കുടുംബത്തിലെ മൂന്ന് സ്ത്രീകൾ ഉൾപ്പെടെ നാലുപേരാണ് ചിത്രമെടുക്കുന്നതിനിടയിൽ ബാലൻസ് തെറ്റി അണക്കെട്ടിലേക്ക് വീണത്. സെൽഫി എടുക്കാൻ പോസ് ചെയ്‌തതിനിടെയായിരുന്നു അപകടം. ചിത്രമെടുത്തുകൊണ്ടിരുന്നയാൾ ഇതുകണ്ട് വെള്ളത്തിൽ ചാടിയെങ്കിലും ഒരാളെ മാത്രമേ രക്ഷിക്കാൻ സാധിച്ചുള്ളു.

ദമ്പതികളായ പ്രഭു, നിവേദിത, അവരുടെ ബന്ധുക്കളായ കനിത, സ്നേഹ, ഉവരാണി, സന്തോഷ് എന്നിവരാണ് സംഘത്തിൽ ഉണ്ടായിരുന്നത്. ശനിയാഴ്‌ച എല്ലാവരുമൊത്താണ് അണക്കെട്ടു കാണാൻ ഇറങ്ങിയത്. അവിടെ വെച്ച് സെൽഫിയെടുക്കുന്നതിനിടയിൽ പ്രഭു ഒഴികെ അഞ്ച് പേർ വെള്ളത്തിൽ വീഴുകയായിരുന്നു. ബാക്കിയുള്ളവർ മുങ്ങിമരിച്ചു. ഇത്തരം സ്ഥലങ്ങളിൽ നിന്നുള്ള സെൽഫി എടുക്കൽ വളരെ അപകടകരമാണെന്നും പോലീസ് പറഞ്ഞു. മൃതദേഹങ്ങൾ കണ്ടെടുത്ത് പോസ്റ്റ്‌മോർട്ടത്തിനായി അയച്ചിട്ടുണ്ട്. സംഭവത്തില്‍ കേസ് രജിസ്റ്റർ ചെയ്ത് അന്വേഷണം തുടങ്ങി.