ലക്ഷ്യം 2029ലെ പൊതു തെരഞ്ഞെടുപ്പ് ! മുന്നൊരുക്കങ്ങൾ തുടങ്ങി ബിജെപി, നേതൃനിരയിൽ വൻ അഴിച്ചുപണി! കെ സുരേന്ദ്രനും അനിൽ ആന്റണിയും ദേശീയ സെക്രട്ടറിമാർ, സ്‌മൃതി ഇറാനി ദേശീയ ജനറൽ സെക്രട്ടറി

ദില്ലി : ബിജെപിയിൽ വിപുലമായ സംഘടനാ പുനഃസംഘടന പ്രഖ്യാപിച്ച് പാർട്ടി ദേശീയ അദ്ധ്യക്ഷൻ നിതിൻ നബിൻ. 2029-ലെ പൊതുതെരഞ്ഞെടുപ്പ് ലക്ഷ്യമിട്ടാണ് പാർട്ടിയിൽ പുതിയ ഭാരവാഹി നിരയെ പ്രഖ്യാപിച്ചിരിക്കുന്നത്. പുതിയ ഉപാദ്ധ്യക്ഷൻമാർ, ജനറൽ സെക്രട്ടറിമാർ, സെക്രട്ടറിമാർ, ദേശീയ വക്താക്കൾ, വിവിധ മോർച്ച തലവൻമാർ ഉൾപ്പെടെ പ്രധാന ഭാരവാഹികളുടെ പട്ടികയാണ് പുറത്തുവന്നത് മുൻ കേന്ദ്രമന്ത്രി സ്മൃതി ഇറാനിയെ ദേശീയ ജനറൽ സെക്രട്ടറിയായി നിയമിച്ചു. മുൻ രാജസ്ഥാൻ മുഖ്യമന്ത്രി വസുന്ധര രാജെ സിന്ധ്യ, രാം മാധവ്, ബൈജയന്ത് ജയ് പാണ്ഡ ഉൾപ്പെടെയുള്ളവരെ ദേശീയ വൈസ് പ്രസിഡന്റുമാരായും തെരഞ്ഞെടുത്തിട്ടുണ്ട്.

ബിഎൽ സന്തോഷ് ദേശീയ ജനറൽ സെക്രട്ടറിയായി തുടരും. കേരളത്തിൽ നിന്ന് കെ സുരേന്ദ്രൻ ദേശീയ സെക്രട്ടറിയാകും. അനിൽ ആന്റണി, ദേശീയ സെക്രട്ടറി സ്ഥാനത്ത് തുടരും. ഉത്തരാഖണ്ഡ് മുൻ മുഖ്യമന്ത്രി തിരത് സിംഗ് റാവത്ത്, ബൈജയന്ത് ജയ് പാണ്ഡ, ഡി പുരന്ദേശ്വരി, രേഖ വർമ്മ, വർഷബെൻ നരേന്ദ്രഭായ് ദോഷി, ഭാരതി പ്രവീൺ പവാർ, മൻപ്രീത് സിംഗ് ബാദൽ, ലാൽ സിംഗ് ആര്യ, എം നാഗരാജ, താരിഖ് മൻസൂർ, മധുചന്ദ്ര കർ എന്നിവരും ദേശീയ വൈസ് പ്രസിഡന്റുമാരുടെ പട്ടികയിലുണ്ട്.

13 ദേശീയ വൈസ് പ്രസിഡന്റുമാരിൽ ആറ് പേർ സ്ത്രീകളാണ്, ഇതിലൂടെ പാർട്ടിയുടെ പ്രധാന സ്ഥാനങ്ങളിൽ കൂടുതൽ സ്ത്രീകൾക്ക് പ്രവർത്തിക്കാൻ അവസരമാണ് നിതിൻ നബിൻ നൽകിയത്. മുസ്ലീം സമുദായത്തിൽ നിന്നുള്ള രണ്ട് പേർക്ക് പുറമേ നാല് വനിതാ സെക്രട്ടറിമാരും ഒരു വനിതാ ജനറൽ സെക്രട്ടറിയും ഉണ്ട്.

വിനോദ് താവ്‌ഡെ, സുനിൽ ബൻസാൽ, ബിപ്ലബ് കുമാർ ദേബ്, സതീഷ് പൂനിയ, ഗജേന്ദ്ര പട്ടേൽ, ഹരീഷ് ദ്വവേദി, സഞ്ജയ് ഭാട്ടിയ തുടങ്ങിയവരാണ് ദേശീയ സെക്രട്ടറിമാരുടെ പട്ടികയിലുള്ളത്. ശിവപ്രകാശ്, സൗദാൻ സിങ് എന്നിവരെ ദേശീയ ജോയിന്റ് ജനറൽ സെക്രട്ടറിമാരായി നിയമിച്ചു. പീയൂഷ് ഗോയലിനെ ദേശീയ ട്രഷററായി നിയമിച്ചപ്പോൾ, തരുൺ ചുഗ് കേന്ദ്ര ഓഫീസ് ഇൻ ചാർജായി പ്രവർത്തിക്കും.

യുവമോർച്ച ദേശീയ അധ്യക്ഷനായി ഡോ. ഹേമംഗ് ജോഷിയെയും മഹിളാ മോർച്ച അധ്യക്ഷയായി രൂപ കുമാരി ചൗധരിയെയും നിയമിച്ചു. സംഘടനാ അടിത്തറ കൂടുതൽ ശക്തമാക്കുന്നതിനും യുവ-വനിതാ പ്രാതിനിധ്യം ഉറപ്പാക്കുന്നതിനുമാണ് പുതിയ പുനഃസംഘടനയിലൂടെ പാർട്ടി ലക്ഷ്യമിടുന്നത്.