ടാറ്റൂ പതിച്ച് ഗ്രൗണ്ടിൽ ഇറങ്ങിയാൽ ഇനി വിലക്ക്; ഫുട്ബോൾ താരങ്ങൾക്ക് കടുത്ത മുന്നറിയിപ്പുമായി ചൈനീസ് ഭരണകൂടം

ബീജിംഗ്:ഇനിമുതൽ ശരീരത്തിൽ ടാറ്റൂ പതിപ്പിച്ച് ഫുട്ബോൾ താരങ്ങൾ ഗ്രൗണ്ടിൽ ഇറങ്ങരുതെന്ന നിർദ്ദേശവുമായി ചൈനീസ് ഭരണകൂടം.

ചൈനീസ് ദേശീയ ടീമിൽ കളിക്കുന്ന താരങ്ങൾ ശരീരത്തിൽ ടാറ്റൂ പതിപ്പിക്കരുതെന്നാണ് പുറത്ത് വിട്ടിരിക്കുന്ന നിർദ്ദേശം. നിർദ്ദേശം ലംഘിച്ചാൽ ആജീവനാന്ത വിലക്കേർപ്പെടുത്തുമെന്നും ഭരണകൂടം മുന്നറിയിപ്പ് നൽകി.

എന്നാൽ നിലവിൽ ദേശീയ ടീമിൽ കളിക്കുന്ന താരങ്ങളിൽ ആരെങ്കിലും ടാറ്റൂ പതിപ്പിച്ചിട്ടുണ്ടെങ്കിൽ അത് മായ്ച്ച് കളയണം. അതല്ലെങ്കിൽ ഫുൾ സ്ലീവ് ജഴ്സി അണിഞ്ഞോ ബാൻഡേജ് ഒട്ടിച്ചോ ടാറ്റൂ മറയ്ക്കണം. പരിശീലനത്തിന് ഇറങ്ങുമ്പോഴും ഈ രീതി തുടരണം.

മാത്രമല്ല താരങ്ങൾ സമൂഹത്തിന് മികച്ച ഉദാഹരണമായി മാറേണ്ടതാണെന്നും അതിൻ്റെ ഭാഗമായാണ് നിർദ്ദേശമെന്നും അധികൃതർ വ്യക്തമാക്കുന്നു.

അതേസമയം സീനിയർ ടീം ഉൾപ്പെടെ വിവിധ ഏജ് ഗ്രൂപ്പുകളിലുള്ള എല്ലാ ദേശീയ ടീമുകൾക്കും ഈ നിബന്ധന ബാധകമാണ്.