രജൗരിയിൽ സൈനികർക്ക് നേരെ നടന്ന ഭീകരാക്രമണം; ഒരു സൈനികന് കൂടി വീരമൃത്യു; പരിക്കേറ്റ റൈഫിൾമാൻ നിശാന്ത് മാലിക്ക് ചികിത്സയിലിരിക്കെ അന്തരിച്ചു

ശ്രീനഗർ: ജമ്മുകശ്മീരിലെ രജൗരിയിലുണ്ടായ ഭീകരാക്രമണത്തിൽ പരിക്കേറ്റ ഒരു ജവാൻ കൂടി വീരമൃത്യു വരിച്ചു. റൈഫിൾമാൻ നിശാന്ത് മാലിക്കാണ് വീരമൃത്യു വരിച്ചത്. നിശാന്തിന്റെ മരണത്തിൽ ഇന്ത്യൻ ആർമി ചീഫ് മനോജ് പാണ്ഡെ അടക്കമുള്ളവർ അനുശോചനം അറിയിച്ചു.

ഇന്നലെ മൂന്ന് സൈനികർ വീരമൃത്യ വരിച്ചിരുന്നു. സുബേദാർ രാജേന്ദ്ര പ്രസാദ്, റൈഫിൾമാൻ മനോജ് കുമാർ, റൈഫിൾ മാൻ ലക്ഷ്മണൻ ഡി എന്നിവർക്കായിരുന്നു ജീവൻ നഷ്ട്ടപ്പെട്ടത്. രജൗരി ജില്ലയിൽ വ്യാഴാഴ്ച രാവിലെയായിരുന്നു ആക്രമണം നടന്നത്.

ഭീകരരുടെ വെടിവെപ്പിൽ പരിക്കേറ്റ 4 ജവാൻമാർ ചികിത്സയിൽ തുടരുകയാണ്. രജൗരിയിൽ നിന്ന് 25 കിലോ മീറ്റർ മാറി ദർഹാർ താലൂക്കിലായിരുന്നു സംഭവം നടന്നത്. ഇവിടുത്തെ പർഗാർ മേഖലയിലെ സൈനിക ക്യാമ്പിന് സമീപം ഭീകരർ നുഴഞ്ഞുകയറാൻ ശ്രമം നടത്തുകയായിരുന്നു.

പ്രദേശത്ത് നുഴഞ്ഞുകയറ്റത്തിന് സാധ്യതയുണ്ടെന്ന മുന്നറിയിപ്പ് ലഭിച്ചതിന്റെ പശ്ചാത്തലത്തിൽ രാവിലെ നടത്തിയ പരിശോധനയിലാണ് രണ്ട് ഭീകരർ നുഴഞ്ഞുകയറാൻ ശ്രമിക്കുന്നത് ശ്രദ്ധയിൽപെട്ടിരുന്നു. തുടർന്ന് പിടികൂടാൻ ശ്രമിച്ചതോടെ ഇവർ വെടിയുതിർത്തിരുന്നു. ഇതോടെ ഏറ്റുമുട്ടലും ആരംഭിക്കുകയായിരുന്നു. സൈന്യത്തിന്റെ പ്രത്യാക്രമണത്തിൽ രണ്ട് ഭീകരരെയും സംഭവസ്ഥലത്ത് വച്ച് തന്നെ സൈന്യം വധിച്ചിരുന്നു.