കാറിന് മുകളില്‍ കണ്ടെയ്‌നര്‍ ലോറി മറിഞ്ഞുണ്ടായ അപകടം ! കൊല്ലപ്പെട്ട ഐടി കമ്പനി ഉടമ ആഡംബര കാർ വാങ്ങിയിട്ട് രണ്ട് മാസം മാത്രം; അവധിക്കാലയാത്ര ദുരന്തത്തിൽ കലാശിച്ചത് വിശ്വസിക്കാനാകാതെ കുടുംബവും ജീവനക്കാരും

ബെംഗളൂരു: കാറിന് മുകളില്‍ കണ്ടെയ്‌നര്‍ ലോറി മറിഞ്ഞുണ്ടായ അപകടത്തില്‍ കൊല്ലപ്പെട്ട ചന്ദ്രാം യാഗപ്പഗോലും കുടുംബവും അപകടത്തില്‍പ്പെട്ട ആഡംബരക്കാർ കാര്‍ വാങ്ങിയിട്ട് രണ്ട് മാസം മാത്രം. ബെംഗളൂരുവിലെ ഐടി കമ്പനിയായ ഐഎഎസ്ടി സോഫ്റ്റ്‌വെയര്‍ സൊലൂഷന്‍സിന്റെ എംഡിയാണ് ചന്ദ്രാം യാഗപ്പഗോൽ. ബെംഗളൂരു റൂറലിലെ നീലമംഗലയ്ക്ക് സമീപം ദേശീയപാത 48-ലാണ് ഇന്നലെ രാവിലെ 11 മണിയോടെയാണ് അപകടമുണ്ടായത്. ബെംഗളൂരുവില്‍ നിന്ന് തുമകുരുവിലേക്ക് പോകുകയായിരുന്നു കണ്ടെയ്നര്‍ ലോറി. കാറും ലോറിയും ഒരേ ദിശയിലായിരുന്നു സഞ്ചരിച്ചിരുന്നത്.

ചന്ദ്രാം യാഗപ്പഗോലും ഭാര്യ ഗൗരഭായും മക്കളായ ഗാനും ദീക്ഷയും ആര്യയും ക്രിസ്‌മസ്‌ അവധിക്കാലം ആഘോഷിക്കാന്‍ വിജയ്പുരയിലേക്കുള്ള യാത്രയിലായിരുന്നു. ഗൗരഭായ്‌യുടെ സഹോദരി വിജയലക്ഷ്മിയും യാത്രയിലുണ്ടായായിരുന്നു. 2018-ലാണ് ചന്ദ്രാം യാഗപ്പഗോല്‍ ഐഎഎസ്ടി സോഫ്റ്റ്‌വെയര്‍ സൊലൂഷന്‍സ് തുടങ്ങിയത്. നിലവിൽ അമ്പതോളം ജീവനക്കാർ ഇവിടെ ജോലി ചെയ്യുന്നുണ്ട്.

അപകടത്തില്‍പെട്ട ഒരു കോടിയിലധികം വില വരുന്ന വോള്‍വോ പ്രീമിയം കാര്‍ ഒക്ടബോറിലാണ് ചന്ദ്രാം യാഗപ്പഗോല്‍ വാങ്ങിയത്. അപകടത്തിന്റേതായി പുറത്തു വന്ന സിസിടിവി ദൃശ്യങ്ങളിൽ അതിവേഗത്തില്‍ വന്ന കണ്ടെയ്‌നര്‍ ലോറി നിയന്ത്രണം നഷ്ടമായി ട്രക്കുമായി കൂട്ടിയിടിക്കുന്നത് കാണാം. ഇടിയുടെ ആഘാതത്തില്‍ ഡിവൈഡറും തകര്‍ത്ത് ലോറി കാറിന് മുകളിലേക്ക് മറിയുകയായിരുന്നു. ട്രക്കും ഇടിയുടെ ആഘാതത്തില്‍ റോഡിലേക്ക് മറിഞ്ഞു. ക്രെയ്‌നും മറ്റും ഉപയോഗിച്ച് ഏറെ നേരത്തെ പരിശ്രമത്തിനൊടുവിലാണ് കാറില്‍ കുടുങ്ങിയവരെ പുറത്തെടുത്തത്. ആറു പേരും സംഭവസ്ഥലത്തുവെച്ച് തന്നെ മരണപ്പെട്ടു.