പ്രളയത്തിൽ കാണാതായ ബൈക്ക് ആറ്റിലെ ചെളിയിൽ പുതഞ്ഞ നിലയിൽ കണ്ടെത്തി; ലഭിച്ചത് പുല്ലകയാറിനു സമീപമുള്ള വർക്ക് ഷോപ്പിൽ നിന്നും ഒഴുകിപ്പോയ ബൈക്ക്

കൂട്ടിക്കൽ : 2021ലെ പ്രളയത്തിൽ വർക്ക് ഷോപ്പിൽ നിന്നും ഒലിച്ചു പോയ ബൈക്ക് പുല്ലകയാറ്റിൽ ചെളിയിൽ പുതഞ്ഞ നിലയിൽ കണ്ടെത്തി. കൊക്കയാർ കളപ്പുരയ്ക്കൽ കെ.ആർ.സുരേഷിന്റെ മകൻ ജിഷ്ണു ഉപയോഗിച്ചിരുന്ന ബൈക്കാണു ഏവരെയും അത്ഭുതപ്പെടുത്തിക്കൊണ്ട് തിരികെ ലഭിച്ചത്. കാഴ്ചയിൽ ഒരു കുഴപ്പവും ഇല്ലെങ്കിലും ബൈക്ക് നിലവിൽ ഉപയോഗിക്കാനാകുന്ന സ്ഥിതിയിലല്ല.

2019 ലാണ് ജിഷ്ണു ബൈക്ക് വാങ്ങിയത്. സ്റ്റാർട്ട് ആകുന്നതിലെ പ്രശ്നങ്ങൾ കാരണം ഇത് പരിഹരിക്കുന്നതിനായി ടൗണിൽ പുല്ലകയാറിനു സമീപമുള്ള വർക്ക് ഷോപ്പിൽ നൽകി. എന്നാൽ കടയിൽ സൂക്ഷിച്ചിരുന്ന ബൈക്ക് വെള്ളം കൊണ്ടുപോയി എന്ന് 2021 നവംബറിൽ പ്രളയം ഉണ്ടായശേഷം കടയുടമ അറിയിച്ചതായി ഇവർ പറയുന്നു. പ്രളയ സമയത്തു ബൈക്ക് ദൂരേക്ക് ഒഴുകി പോയി കാണും എന്നായിരുന്നു ഇവരുടെ നിഗമനം.

എന്നാൽ കൂട്ടിക്കൽ സ്വദേശികളായ മജീദ്, രാജു എന്നിവരാണ് കഴിഞ്ഞ ദിവസം ആറ്റിൽ ചെളിയിൽ പതിഞ്ഞ നിലയിൽ ബൈക്ക് കണ്ടെത്തിയത്. ടൗണിന് സമീപം പുഴ പുനർജനി പദ്ധതി പ്രകാരം ഒരു വർഷം മുൻപ് കല്ലും മണലും എല്ലാം നീക്കം ചെയ്തിരുന്നു. ചെളിയിൽ പുതഞ്ഞു കിടന്നുവെങ്കിലും നഷ്ടപ്പെട്ടപ്പോൾ എങ്ങനെ ആയിരുന്നോ അതുപോലെ തന്നെയാണ് കഴുകി എടുത്തപ്പോൾ ബൈക്ക് കാണപ്പെടുന്നത്.