കേസെടുത്തത് സമയപരിധി അവസാനിച്ച ശേഷം !!!സംവിധായകൻ രഞ്ജിത്തിനെതിരെ ബംഗാളി നടി നൽകിയ ലൈംഗികാതിക്രമ കേസ് റദ്ദാക്കി ഹൈക്കോടതി

കൊച്ചി : സംവിധായകൻ രഞ്ജിത്തിനെതിരെ ബംഗാളി നടി നൽകിയ ലൈംഗികാതിക്രമ കേസ് ഹൈക്കോടതി റദ്ദാക്കി. എറണാകുളം നോർത്ത് പോലീസ് റജിസ്റ്റർ ചെയ്ത കേസാണ് കോടതി ഇന്ന് റദ്ദാക്കിയത്. രണ്ടു വർഷം വരെ ശിക്ഷ ലഭിക്കാവുന്ന ഐപിസി പ്രകാരമുള്ള കുറ്റങ്ങളിൽ 3 വർഷം വരെയാണ് മജിസ്ട്രേറ്റ് കോടതിക്ക് കേസെടുക്കാവുന്നത്. ഇവിടെ 15 വര്‍ഷത്തിനു ശേഷമാണ് കോടതി കേസെടുത്തത് എന്നതിനാൽ അത് നിയമപരമായി നിലനിൽക്കില്ല എന്നു ചൂണ്ടിക്കാട്ടിയാണ് ഹൈക്കോടതിയുടെ നടപടി. 2009 ലാണ് പരാതിക്കടിസ്ഥാനമായ സംഭവം നടന്നു എന്നവകാശപ്പെടുന്നത്,
എന്നാൽ ഹേമ കമ്മിറ്റി റിപ്പോർട്ടിനു പിന്നാലെയുണ്ടായ വെളിപ്പെടുത്തലുകളോട് അനുബന്ധിച്ച് 2024ലാണ് നടി പരാതി നൽകുന്നത്. ഐപിസി 354, 509 വകുപ്പുകള്‍ പ്രകാരമാണ് കേസെടുത്തത്.

വിവാദം ശക്തമായതോടെ രഞ്ജിത്ത് ചലച്ചിത്ര അക്കാദമി ചെയർമാൻ സ്ഥാനം രാജി വച്ചിരുന്നു. കോഴിക്കോട് സ്വദേശിയായ ഒരു യുവാവിനെ ബെംഗളുരുവിലെ ഹോട്ടലിൽ വച്ച് പീഡിപ്പിച്ചെന്ന കേസും രഞ്ജിത്തിനെതിരെ ചുമത്തപ്പെട്ടെങ്കിലും പരാതിയിലെ പൊരുത്തക്കേടുകൾ ചൂണ്ടി കാട്ടി കേസ് കർണാടക ഹൈക്കോടതി ഇക്കഴിഞ്ഞ ജൂലൈയിൽ റദ്ദാക്കി.