ജോലി ചെയ്തിട്ടും ശപിച്ചു കൊണ്ട് കൂലി നല്‍കിയത് പ്രകോപനമായി !യഹോവ സാക്ഷികളുടെ യോഗത്തിൽ പങ്കെടുത്തവരുടെ വീട്ടിലെ മോഷണത്തിൽ പിടിയിലായ പ്രതിയുടെ വെളിപ്പെടുത്തൽ ; പ്രതിയും കൂട്ടായ്മയിലെ അംഗം

കൊച്ചി : കളമശ്ശേരി സ്‌ഫോടനം നടന്ന യഹോവ സാക്ഷികളുടെ പ്രാര്‍ത്ഥനാ യോഗത്തില്‍ പങ്കെടുത്ത സ്ത്രീയുടെ വീട്ടില്‍നിന്ന് 27.5 പവന്‍ സ്വർണ്ണവും വജ്രാഭരണങ്ങളും മോഷ്ടിച്ചയാളെ പോലീസ് അറസ്റ്റ് ചെയ്‌തു. സംഭവത്തിൽ എളംകുളം ബോസ് നഗര്‍ പറയന്തറ ജോര്‍ജ് പ്രിന്‍സ് (36) ആണ് പിടിയിലായത്. പ്രതിയും യഹോവ സാക്ഷി കൂട്ടായ്മയിലുള്ളയാളാണ്.

കഴിഞ്ഞ 29-ന് രാവിലെ 8.30-ന് പച്ചാളം സ്വദേശി തങ്കം ജോണിന്റെ വീട്ടില്‍, വീട്ടുകാർ യഹോവ സാക്ഷി സമ്മേളനത്തിൽ പോയ തക്കത്തിനാണ് പ്രതി അതിക്രമിച്ചുകയറുകയും കമ്പിപ്പാര ഉപയോഗിച്ച് അടുക്കള വാതില്‍ പൊളിച്ച് അകത്തു കടന്ന് മോഷണം നടത്തുകയായിരുന്നു. കിടപ്പുമുറിയിലെ അലമാരകള്‍ കുത്തിത്തുറന്ന ശേഷം 27.5 പവന്‍ തൂക്കം വരുന്ന സ്വര്‍ണാഭരണങ്ങളും വജ്രാഭരണങ്ങളുമാണ് കവർന്നെടുത്തത്.

വര്‍ഷങ്ങളായി പരാതിക്കാരിയുടെ വീട്ടിലെ പ്ലംബിങ് ജോലികള്‍ ചെയ്തിരുന്നത് പ്രതിയാണ്. അടുത്തിടെ ഏല്‍പ്പിച്ച ജോലി ഇയാള്‍ കൃത്യമായി ചെയ്തില്ലെന്ന് വീട്ടുകാര്‍ പരാതിപ്പെട്ടിരുന്നു. കൃത്യമായി ജോലിചെയ്തില്ലെന്ന് പറഞ്ഞ് കൂലി നല്‍കിയശേഷം നീ പാപികളുടെ കൂട്ടത്തില്‍പ്പെടുമെന്ന്’ വീട്ടുകാര്‍ ശപിച്ചുവെന്നും ജോലി ചെയ്തിട്ടും ശപിച്ചു കൊണ്ട് കൂലി നല്‍കിയതു മൂലമുള്ള പ്രകോപനം മൂലമാണ് താൻ മോഷണം നടത്തിയതെന്നുമാണ് പ്രതി പറയുന്നത്.