സ്‌ക്രീനുകളിൽ നിറഞ്ഞ് സ്വാതന്ത്ര്യത്തിന്റെ ആവേശം ; ‘ഹർ ഘർ തിരംഗ’ ചലച്ചിത്രമേളയ്ക്ക് രാജ്യമൊട്ടാകെ തുടക്കം

ദില്ലി : ഭാരതത്തിന്റെ സ്വാതന്ത്ര്യത്തിന്റെയും ഐക്യത്തിന്റെയും കഥകൾ വെള്ളിത്തിരയിൽ എത്തിക്കുന്ന മൂന്ന് ദിവസത്തെ ‘ഹർ ഘർ തിരംഗ’ ചലച്ചിത്രമേളയ്ക്ക് രാജ്യമൊട്ടാകെ ഗംഭീര തുടക്കം. ക്ലാസിക് ചിത്രങ്ങളും, പ്രേക്ഷകപ്രീതി നേടിയ സമകാലിക ദേശഭക്തി സിനിമകളും കോർത്തിണക്കിയാണ് നാഷണൽ ഫിലിം ഡെവലപ്‌മെന്റ് കോർപ്പറേഷൻ (NFDC) ഈ മേള സംഘടിപ്പിക്കുന്നത്. ദില്ലി , മുംബൈ, ചെന്നൈ, പൂനെ തുടങ്ങിയ പ്രധാന നഗരങ്ങളിൽ ചലച്ചിത്രമേളയ്ക്ക് താരങ്ങളുടെ സാന്നിധ്യത്തിൽ വർണ്ണാഭമായ തുടക്കമായി.

‘ഷഹീദ്’, ‘സ്വാതന്ത്ര്യ വീർ സവർക്കർ’ എന്നീ ചിത്രങ്ങളാണ് ചലച്ചിത്രമേളയുടെ ഉദ്ഘാടന ചിത്രങ്ങളായി പ്രദർശിപ്പിച്ചത്. തുടർന്നുള്ള ദിവസങ്ങളിൽ ‘ഉറി’, ‘ആർആർആർ’, ‘താനാജി’, ‘മേജർ’ തുടങ്ങിയ ചിത്രങ്ങൾ പ്രദർശിപ്പിക്കും. ഇന്ത്യയുടെ സ്വാതന്ത്ര്യ സമരചരിത്രം, സൈനികരുടെ വീരസാഹസങ്ങൾ, ദേശഭക്തിയുടെ ആധുനിക ആവിഷ്കാരങ്ങൾ എന്നിവയെല്ലാം ഈ സിനിമകളിലൂടെ പ്രേക്ഷകരിലേക്ക് എത്തിക്കുക എന്നതാണ് ഫെസ്റ്റിവലിന്റെ ലക്ഷ്യം.

സെൻട്രൽ ബോർഡ് ഓഫ് ഫിലിം സർട്ടിഫിക്കേഷൻ (CBFC) ചെയർപേഴ്‌സൺ സഞ്ജയ് ജാജു, ഈ ചലച്ചിത്രമേളയുടെ പ്രാധാന്യം ഊന്നിപ്പറഞ്ഞു. സിനിമ എന്ന മാദ്ധ്യമത്തിലൂടെ ഇന്ത്യയുടെ സമ്പന്നമായ സാംസ്കാരിക ചരിത്രവും പൈതൃകവും പ്രദർശിപ്പിക്കുക എന്നതാണ് ‘ഹർ ഘർ തിരംഗ’ ചലച്ചിത്രമേള ലക്ഷ്യമിടുന്നതെന്ന് അദ്ദേഹം അഭിപ്രായപ്പെട്ടു.

ദില്ലി കലാ സാംസ്കാരിക വകുപ്പ് മന്ത്രി കപിൽ മിശ്രയും ഈ സംരംഭത്തെ പ്രശംസിച്ചു. “ഈ ചലച്ചിത്രമേള നാം സ്വാതന്ത്ര്യം നേടിയെടുത്ത യാത്രയുടെ ഒരു ഓർമ്മപ്പെടുത്തലാണ്” എന്ന് അദ്ദേഹം പറഞ്ഞു.

ഇന്ത്യൻ സ്വാതന്ത്ര്യത്തിന്റെ 75-ാം വാർഷികത്തോടനുബന്ധിച്ച് കേന്ദ്രസർക്കാർ ആഹ്വാനം ചെയ്ത ‘ഹർ ഘർ തിരംഗ’ ക്യാമ്പെയ്‌നിന്റെ ഭാഗമായാണ് ഈ ചലച്ചിത്രമേളയും സംഘടിപ്പിക്കുന്നത്. ചലച്ചിത്രമേളയോടനുബന്ധിച്ച് വിവിധ നഗരങ്ങളിൽ പ്രത്യേക ചർച്ചകളും സംവാദങ്ങളും സംഘടിപ്പിക്കുന്നുണ്ട്.