കാവടി കാണാൻ വീടുപൂട്ടി വീട്ടുകാർ പോയി;പിന്നാലെ പൂട്ട് പൊളിച്ച് കയറിയ കള്ളൻ 23 പവൻ സ്വർണ്ണവുമായി കടന്നു

തിരുവനന്തപുരം: കാവടി ഘോഷയാത്ര കാണാൻ വീടുപൂട്ടി വീട്ടുകാർ പോയതിന് പിന്നാലെ പൂട്ട് പൊളിച്ച് കയറിയ കള്ളൻ 23 പവൻ സ്വർണ്ണവുമായി സ്ഥലംവിട്ടു.കാട്ടാക്കട ആനാകോട് മണിയൻ പറമ്പിൽ വീട്ടിൽ വാട്ടർ അതോറിറ്റി ജീവനക്കാരൻ രാജേന്ദ്രന്റെ വീട്ടിലാണ് മോഷണം നടന്നത്. ശനിയാഴ്ച രാത്രി ഏഴരയോടെ വീടിനു സമീപത്തെ സുബ്രഹ്മണ്യ ക്ഷേത്രത്തിൽ കാവടി ഘോഷയാത്ര കാണാൻ കുടുംബ സമേതം വീടുപൂട്ടി പോയി. ഒൻപതോടെ തിരികെയെത്തി. രണ്ടര മണിക്കൂറിനുള്ളിലായിരുന്നു കവർച്ച നടന്നത്.

വീടിന്റെ പിൻവാതിൽ തുറന്ന് അകത്ത് കയറിയ കള്ളൻ കിടപ്പ് മുറിയിലെ അലമാരയിൽ സൂക്ഷിച്ചിരുന്ന സ്വർണ്ണമാണ് മോഷ്ടിച്ചത്. രണ്ടര മണിക്കൂറിനുള്ളിൽ വീട്ടുകാർ തിരിച്ചെത്തിയപ്പോഴാണ് കവർച്ച വിവരം മനസ്സിലാക്കിയത്. ആസൂത്രിത കവർച്ചയാണോ എന്ന് പോലീസ് സംശയിക്കുന്നു.ക്ഷേത്ര ഉത്സവവും വീട്ടുകാർ ക്ഷേത്രത്തിലേയ്ക്ക് പോകും എന്ന് അറിയുന്നവർ ആരെങ്കിലും കവർച്ച ആസൂത്രണം ചെയ്തിരിക്കാം എന്നാണ് നിഗമനം. ശാസ്ത്രീയ കുറ്റാന്വേഷണ സംഘവും ഡോഗ് സ്ക്വാഡും സ്ഥലത്തെത്തി തെളിവ് ശേഖരിച്ചു.