ഒഴുക്ക് തുടരുന്നു.. മുൻ സിപിഎം എംഎൽഎ എസ്. രാജേന്ദ്രനും ബിജെപിയിലേക്ക് ? ബിജെപി നേതാവ് പ്രകാശ് ജാവദേക്കറുമായി ദില്ലിയിലെ വസതിയിൽ കൂടിക്കാഴ്ച

ദേവികുളം മുൻ എംഎൽഎ എസ്.രാജേന്ദ്രൻ ബിജെപി അംഗത്വം സ്വീകരിച്ചേക്കുമെന്ന് സൂചന . ബിജെപിയുടെ കേരളത്തിന്റെ പ്രഭാരിയും മുൻ കേന്ദ്രമന്ത്രിയുമായ പ്രകാശ് ജാവഡേക്കറുടെ ദില്ലിയിലെ വസതയിലെത്തി എസ്. രാജേന്ദ്രൻ കൂടിക്കാഴ്ച നടത്തി. കൂടിക്കാഴ്ചയുടെ ചിത്രങ്ങൾ പുറത്ത് വന്നു. സസ്പെൻഷൻ കാലാവധി കഴിഞ്ഞെങ്കിലും രാജേന്ദ്രൻ സിപിഎം അംഗത്വം പുതുക്കിയിരുന്നില്ല. പ്രാദേശിക നേതാക്കൾ രാജേന്ദ്രനു വീട്ടിലെത്തി പാർട്ടി അംഗത്വ ഫോം കൈമാറിയിരുന്നു.മുതിർന്ന നേതാവായ തന്നെ അനുനയിപ്പിക്കാൻ പ്രാദേശിക നേതാക്കളെ പാർട്ടി നേതൃത്വം അയച്ചത് തന്നെ അപമാനിക്കുന്നതിനു തുല്യമാണെന്ന് രാജേന്ദ്രൻ പ്രതികരിച്ചിരുന്നു. കഴിഞ്ഞ നിയമസഭാ തെരഞ്ഞെടുപ്പിൽ, എൽഡിഎഫ് സ്ഥാനാർത്ഥിയായിരുന്ന എ.രാജയെ തോൽപിക്കാൻ ശ്രമിച്ചെന്നാരോപിച്ചാണ് രാജേന്ദ്രനെ സിപിഎം സസ്പെൻഡ് ചെയ്തത്.

കഴിഞ്ഞ ദിവസം എല്‍ഡിഎഫ് സ്ഥാനാര്‍ഥി ജോയ്‌സ് ജോര്‍ജിന്റെ ദേവികുളം മണ്ഡലം കണ്‍വന്‍ഷനില്‍ എസ്.രാജേന്ദ്രൻ പങ്കെടുക്കുകയും. മണ്ഡല തല പ്രചാരണത്തിന്റെ രക്ഷാധികാരിയായി എസ്.രാജേന്ദ്രനെ പ്രഖ്യാപിക്കുകയും ചെയ്തിരുന്നു. ഇതിനിടെയാണ് സിപിഎം നേതൃത്വത്തെ വെട്ടിലാക്കി കൊണ്ടുള്ള ദില്ലി സന്ദർശനം. ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ അടക്കമുള്ള നേതാക്കളും ദില്ലയിലുണ്ട്. കേന്ദ്ര നേതാക്കളുമായി കെ സുരേന്ദ്രൻ അടക്കമുള്ളവര്‍ ചര്‍ച്ച നടത്തുന്നുണ്ട്. കൂടുതല്‍ ചര്‍ച്ചകള്‍ക്കുശേഷമായിരിക്കും .രാജേന്ദ്രന്റെ ബിജെപി പ്രവേശനം സംബന്ധിച്ച തീരുമാനം ഉണ്ടാകുകയെന്നാണ് വിവരം.