പുരയ്ക്ക് മീതെ വളർന്ന സ്വർണ്ണ മരത്തെ വെട്ടാനൊരുങ്ങി ഇന്റൽ !ഇന്റൽ എന്ന പേരിന് പ്രാധാന്യം കുറയുന്നു; ‘ഐ’ എന്ന മൈക്രോചിപ് സീരീസ് പേര് മാറ്റാനൊരുങ്ങി കമ്പനി

ചിപ് നിർമ്മാണ രംഗത്തെ പ്രമുഖരായ ഇന്റൽ തങ്ങളുടെ ഏറ്റവും ജനകീയമായ മൈക്രോചിപ് ശ്രേണിയുടെ പേരു മാറ്റുന്നു. നീണ്ട 15 വർഷങ്ങൾക്കുശേഷമാണ് ഇത്തരമൊരു പേര് മാറ്റത്തിന് കമ്പനി ഒരുങ്ങുന്നത്. ഐ5, ഐ7, ഐ9, ഐ13 എന്നിങ്ങനെ അറിയപ്പെട്ടിരുന്ന ശ്രേണിയുടെ പേരാണ് മാറ്റുന്നത്. പുതിയ ചിപ്പുകൾക്ക് തലമുറ വിശേഷണം നൽകുന്ന കീഴ്വഴക്കവും കമ്പനി അവസാനിപ്പിക്കും. ഇതോടെ ഇനി വരാനിരിക്കുന്ന ചിപ്പുകളെ കമ്പനി 14th Gen എന്നു വിളിക്കില്ല.

ഐ7, ഐ9 തുടങ്ങിയ പേരുകൾക്ക് പ്രാധാന്യം വന്നതോടെ ഇന്റൽ എന്ന പേരിനു പ്രാധാന്യം കുറയുന്നുവെന്ന കണ്ടെത്തലിനെത്തുടർന്നാണ് കമ്പനിയുടെ പുതിയ നീക്കം. ഇനി മുതൽ ഇന്റൽ, ഇന്റൽ കോർ, ഇന്റൽ കോർ അൾട്ര എന്നീ മൂന്നു ശ്രേണികളിലായാണ് ചിപ്പുകൾ വിപണിയിലെത്തുക.