കുട്ടി നടന്ന് പോകാനുള്ള സാധ്യതകൾ തള്ളി കളയാനാവില്ല; സ്ഥലത്ത് ശാസ്ത്രീയ പരിശോധനകൾ നടത്തും; രണ്ട് വയസുകാരിയുടെ ആരോഗ്യനില തൃപ്തികരം

തിരുവനന്തപുരം: രണ്ടരവയസുകാരിയെ കണ്ടെത്തിയ സ്ഥലത്ത് ശാസ്ത്രീയ പരിശോധനകൾ നടത്താനൊരുങ്ങി പോലീസ്. കുട്ടി നടന്നു പോകാനുള്ള സാധ്യതകൾ തള്ളി കളയാനാവില്ലെന്നും കുട്ടിയെ ആരെങ്കിലും ഇവിടെ ഉപേക്ഷിച്ചു പോയതാണോ തുടങ്ങിയ വിവരങ്ങൾ പരിശോധിക്കുമെന്നും പോലീസ് അറിയിച്ചു. നിലവിൽ എസ്ടി ആശുപത്രിയിൽ ചികിത്സയിലാണ് കുട്ടി.

ആശുപത്രിയിൽ ചികിത്സയിലിരിക്കുന്ന കുഞ്ഞിന്റെ ആരോഗ്യനില തൃപ്തികരമാണ്. 24 മണിക്കൂർ കുഞ്ഞിനെ നിരീക്ഷണത്തിൽ വച്ച ശേഷം ആരോഗ്യ സ്ഥിതിയിൽ പ്രശ്‌നങ്ങളില്ലെങ്കിൽ കുഞ്ഞിനെ മാതാപിതാക്കൾക്കൊപ്പം വിട്ടയയ്‌ക്കുമെന്ന് മെഡിക്കൽ സംഘം അറിയിച്ചു. കുഞ്ഞിന്റെ ആരോഗ്യ സ്ഥിതി മെച്ചപ്പെടുന്നതിനനുസരിച്ച് വിവരങ്ങൾ ചോദിച്ചറിയാനാണ് പോലീസിന്റെ നീക്കം. ഇത് കേസിന് നിർണായ തെളിവാകുമെന്ന് പോലീസ് വ്യക്തമാക്കി. ചികിത്സയ്‌ക്ക് ശേഷം കുഞ്ഞിനെ സിഡബ്ല്യസി സംരക്ഷണകേന്ദ്രത്തിലേക്ക് മാറ്റുന്നതുമായി ബന്ധപ്പെട്ട കാര്യങ്ങളും ചർച്ച ചെയ്യുന്നുണ്ടെന്ന് അധികൃതർ അറിയിച്ചു.