ചോദ്യപേപ്പർ പുറത്തെടുത്തത് സീൽഡ് കവറിന്റെ പുറകുവശം മുറിച്ച് ! ഫോട്ടോ എടുത്ത് എംഎസ് സൊലൂഷൻസ് അദ്ധ്യാപകന് അയച്ചുകൊടുത്തു!! ; ചോദ്യപേപ്പർ ചോർച്ചയിൽ അറസ്റ്റിലായ പ്യൂണിന്റെ മൊഴി പുറത്ത്

കോഴിക്കോട് : പത്താം ക്ലാസിലെ ക്രിസ്മസ് ചോദ്യപേപ്പർ ചോർത്തിയ സംഭവത്തിൽ പിടിയിലായ മലപ്പുറം മേൽമുറി മഅ്ദിൻ ഹയർ സെക്കൻഡറി സ്‌കൂൾ പ്യൂൺ അബ്ദുൽ നാസറിന്റെ മൊഴി പുറത്ത്. ചോദ്യപ്പേപ്പറുകളുടെ സീൽഡ് കവർ മുറിച്ച് ഫോട്ടോ എടുത്തുകൊടുക്കുകയായിരുന്നുവെന്നാണ് അബ്ദുൽ നാസർ ക്രൈം ബ്രാഞ്ചിന് മൊഴി നൽകിയിരിക്കുന്നത്.

പാക്ക് ചെയ്ത സീൽഡ് കവറിന്റെ പുറകുവശം മുറിച്ചാണു ചോദ്യക്കടലാസ് പുറത്തെടുത്തത്. ശേഷം ഫോട്ടോ എടുത്ത് എംഎസ് സൊലൂഷൻസ് അദ്ധ്യാപകൻ ഫഹദിന് അയച്ചുകൊടുത്തു. ചോദ്യക്കടലാസ് തിരികെ വച്ചശേഷം പഴയതുപോലെ ഒട്ടിച്ചുവച്ചു. ചോദ്യക്കടലാസ് ചോർത്തിയത് സ്കൂൾ അധികൃതർ അറിഞ്ഞിട്ടില്ല. ചോദ്യക്കടലാസ് ചോർത്തിയെന്ന് അബ്ദുൽ നാസർ സമ്മതിച്ചെന്നും ക്രൈംബ്രാഞ്ച് അറിയിച്ചു.

പ്ലസ് വൺ ഫിസിക്സ്, കെമിസ്ട്രി, ബയോളജി, കണക്ക് വിഷയങ്ങളുടെ ചോദ്യക്കടലാസും എസ്എസ്എൽസി ഇംഗ്ളീഷ് പരീക്ഷയുടെ ചോദ്യക്കടലാസും ചോർത്തിയെന്നാണു നാസർ സമ്മതിച്ചിരിക്കുന്നത്. നാസറിന്റെ ഫോൺ പരിശോധിച്ചതിൽനിന്നു ഫഹദിന് അയച്ച മെസേജുകൾ ഡിലീറ്റ് ചെയ്തതായി കണ്ടെത്തി. ഫഹദിന്റെ ഫോണിൽ നാസറുമായുള്ള ചാറ്റുകൾ ഫോർമാറ്റ് ചെയ്തുവെന്നും കണ്ടെത്തി.

എംഎസ് സൊലൂഷൻസ് അദ്ധ്യാപകനായ ഫഹദ് മുമ്പ് മേൽമുറി സ്കൂളിൽ അദ്ധ്യാപകനായി ജോലി ചെയ്തിരുന്നു. ആ സമയത്താണ് നാസറും ഫഹദും തമ്മിൽ അടുത്ത ബന്ധമുണ്ടായത്. എംഎസ് സൊലൂഷൻസ് അദ്ധ്യാപകരായ ജിഷ്ണു, ഫഹദ് എന്നിവരെ നേരത്തേ ക്രൈംബ്രാഞ്ച് അറസ്റ്റ് ചെയ്തിരുന്നു. ഇവരെ ചോദ്യം ചെയ്തതിൽനിന്നാണു നാസറിന്റെ പങ്ക് വ്യക്തമായത്. എംഎസ് സൊലൂഷൻസ് സിഇഒ ഷുഹൈബിനെ അറസ്റ്റ് ചെയ്തില്ല. ഇയാളുടെ മുൻകൂർ ജാമ്യാപേക്ഷ ഹൈക്കോടതിയുടെ പരിഗണനയിലാണ്. ഇയാളെയും അന്വേഷണ സംഘം ചോദ്യം ചെയ്തിരുന്നു.