സാമ്പത്തിക രംഗത്തിന് കരുത്തുപകരാൻ ‘ടാക്‌സേഷൻ ആൻഡ് അദർ അമൻഡ്‌മെന്റ് ബിൽ 2026’ രാജ്യസഭയും പാസാക്കി! യുപിഐ ഇടപാടുകൾക്ക് നിരക്കുകൾ ബാധകമല്ലെന്ന് ധനമന്ത്രി നിർമ്മല സീതാരാമൻ

ദില്ലി : രാജ്യത്തിന്റെ സാമ്പത്തിക അടിത്തറ ഭദ്രമാക്കാനും ആഗോള നിക്ഷേപങ്ങൾ ആകർഷിക്കാനുമുള്ള നിർണ്ണായക നിയമനിർമ്മാണവുമായി കേന്ദ്രസർക്കാർ മുന്നോട്ട്. ടാക്‌സേഷൻ ആൻഡ് അദർ ലോസ് അമൻഡ്‌മെന്റ് ബിൽ 2026 രാജ്യസഭയും പാസാക്കി. കേന്ദ്ര ധനകാര്യ മന്ത്രി നിർമ്മല സീതാരാമൻ അവതരിപ്പിച്ച ബിൽ, ഈ വർഷം ജൂൺ അഞ്ചിന് പുറത്തിറക്കിയ ആദായനികുതി ഭേദഗതി ഓർഡിനൻസിന് പകരമായാണ് കൊണ്ടുവന്നിരിക്കുന്നത്. നിലവിലുള്ള ആഗോള സാമ്പത്തിക പ്രതിസന്ധികളെയും ബാഹ്യ ആഘാതങ്ങളെയും നേരിടാനും ആഭ്യന്തര വിപണിയിൽ സ്ഥിരത ഉറപ്പാക്കാനും ലക്ഷ്യമിട്ടാണ് ഈ നിയമഭേദഗതി നടപ്പിലാക്കിയിരിക്കുന്നത്.

സർക്കാർ സെക്യൂരിറ്റികളിലെ നിക്ഷേപങ്ങളിൽ നിന്നുള്ള പലിശ വരുമാനത്തിന് വിദേശ നിക്ഷേപ സ്ഥാപനങ്ങൾക്കും ബാങ്ക് ഫോർ ഇന്റർനാഷണൽ സെറ്റിൽമെന്റ്സിനും ആദായനികുതിയിൽ നിന്ന് ഇളവ് നൽകുന്നതാണ് ബില്ലിലെ പ്രധാന വ്യവസ്ഥകളിൽ ഒന്ന്. ഈ വർഷം ഏപ്രിൽ ഒന്ന് മുതൽ ഈ ഇളവ് പ്രാബല്യത്തിൽ വരും. കൂടാതെ, വിജ്ഞാപനം ചെയ്ത പ്രത്യേക മേഖലകളിൽ വെച്ച് വിദേശ കമ്പനികൾ വജ്രങ്ങൾ വിൽക്കുന്നതിലൂടെ നേടുന്ന വരുമാനത്തിനും ആദായനികുതി ഇളവ് ബാധകമാക്കിയിട്ടുണ്ട്. രാജ്യത്ത് വജ്ര വ്യാപാരത്തിന്റെ മുഴുവൻ മൂല്യശൃംഖലയും എത്തിക്കുക, ആഗോള വജ്ര വ്യാപാര ഭീമന്മാർക്ക് ഇന്ത്യയിൽ മൊത്തവ്യാപാര പ്രവർത്തനങ്ങൾ ആരംഭിക്കാൻ അവസരം ഒരുക്കുക എന്നിവയാണ് ഇതിലൂടെ ലക്ഷ്യമിടുന്നത്.

ഇന്ത്യയുടെ നിർമ്മാണ മേഖലയെ ശക്തിപ്പെടുത്താനും കൂടുതൽ നിക്ഷേപങ്ങൾ ആകർഷിക്കാനും തൊഴിലവസരങ്ങൾ സൃഷ്ടിക്കാനുമാണ് ബിൽ ലക്ഷ്യമിടുന്നതെന്ന് ചർച്ചയ്ക്ക് മറുപടി നൽകിക്കൊണ്ട് കേന്ദ്ര ധനമന്ത്രി നിർമ്മല സീതാരാമൻ വ്യക്തമാക്കി. ഇന്ത്യയിലെ നിശ്ചിത ഡാറ്റാ സെന്ററുകളിൽ നിന്ന് ഡാറ്റാ സേവനങ്ങൾ സ്വീകരിക്കുന്ന വിദേശ കമ്പനികൾക്ക് നികുതി ഇളവ് നൽകുന്നതാണ് രണ്ടാമത്തെ പ്രധാന പരിഷ്കരണമെന്നും മന്ത്രി അറിയിച്ചു. ഇത് ആഗോള ക്ലൗഡ് സേവന ദാതാക്കൾക്ക് ബിസിനസ്സ് ചെയ്യുന്നത് കൂടുതൽ എളുപ്പമാക്കുകയും, ഇന്ത്യയുടെ ഡാറ്റാ സെന്റർ ആവാസവ്യവസ്ഥയെയും എ.ഐ അധിഷ്ഠിത ഡാറ്റാ നഗരങ്ങളുടെ വികസനത്തെയും വലിയ രീതിയിൽ സഹായിക്കുകയും ചെയ്യും.

യുപിഐ ഉപയോക്താക്കൾക്ക് മേൽ യാതൊരുവിധ നികുതിയോ ഇടപാട് നിരക്കുകളോ ഈടാക്കുന്നില്ലെന്ന് ധനമന്ത്രി ഉറപ്പിച്ചു പറഞ്ഞു. ഡിജിറ്റൽ പേയ്മെന്റ് രീതികൾക്ക് നിരക്കുകളിൽ നിന്ന് തുടർന്നും നിയമപരമായ സംരക്ഷണം ലഭിക്കുമെന്നും, മെർച്ചന്റ് ഡിസ്കൗണ്ട് റേറ്റ് (എം.ഡി.ആർ) ചട്ടക്കൂട് ഇതുവരെ അന്തിമമാക്കപ്പെട്ടിട്ടില്ലെന്നും നിർമ്മല സീതാരാമൻ വ്യക്തമാക്കി. ചെറിയ വ്യാപാരികളും ഉപഭോക്താക്കളും യു.പി.ഐ ഇടപാടുകൾക്ക് എം.ഡി.ആർ ചാർജുകൾ നൽകേണ്ടി വരില്ലെന്നും മന്ത്രി കൂട്ടിച്ചേർത്തു.