മദ്യപാനത്തിനിടെ കയ്യാങ്കളി; സഹോദരനെ വെട്ടിയ യുവാവ് ഷോക്കേറ്റ് മരിച്ചു

പെരിങ്ങര: മദ്യപിക്കുന്നതിനിടെയുണ്ടായ തർക്കത്തിൽ സഹോദരനെ വെട്ടിയ യുവാവ് ഷോക്കേറ്റ് മരിച്ചു. പെരിങ്ങര ചിറയിൽ വീട്ടിൽ സന്തോഷ് ആണ് മരിച്ചത്. മദ്യപാനത്തിനിടെ ഇരുവരും തമ്മിൽ വാക്കേറ്റമുണ്ടാവുകയും തുടർന്നുണ്ടായ കയ്യാങ്കളിയിൽ സഹോദരന് വെട്ടേൽക്കുകയുമായിരുന്നു. സഹോദരൻ സജീവിനെയാണ് മൂത്ത സഹോദരൻ സന്തോഷ് വെട്ടിയത്.

ആക്രമണം നടന്നയുടൻ സംഭവ സ്ഥലത്തുനിന്ന് ഓടിയ സന്തോഷ് തൊട്ടടുത്തുള്ള പഞ്ചായത്ത് ഓഫിസിന്റെ മതിൽ ചാടിക്കടക്കുകയായിരുന്നു. ഓടുന്നതിനിടയിൽ മതിലിനോട് ചേർന്നുണ്ടായിരുന്ന എർത്ത് കമ്പിയിൽ തട്ടി ഷോക്കേറ്റതെന്നാണ് നിഗമനം. കനത്ത മഴമൂലം പഞ്ചായത്ത് ഓഫിസിലും പരിസരത്തും വെള്ളം നിറഞ്ഞിരിക്കുകയായിരുന്നു.

സന്തോഷിനെ വെള്ളത്തിൽ വീണു കിടക്കുന്ന നിലയിലാണ് കണ്ടെത്തിയത്. തലയ്ക്ക് വെട്ടേറ്റ സജീവിനെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.