ആർഭാട ജീവിതത്തിന് വേണ്ടി കുടിവെള്ള പദ്ധതിയിൽ മോഷണം; പിടിയിലായത് 15 പേർ, ഭൂരിഭാഗവും കുട്ടികൾ

കൊച്ചി: മൂവാറ്റുപുഴ വാളകം പൊട്ടുമുകൾ മേഖലയിലെ കുടിവെള്ള പദ്ധതിയുടെ നിർമാണ സ്ഥലത്ത് നിന്ന് ലക്ഷക്കണക്കിന് രൂപയുടെ സാമഗ്രികൾ മോഷ്ടിച്ച സംഭവത്തിൽ 15 പേരെ പൊലീസ് പിടികൂടി. ആക്രി വ്യാപാരിയും മോഷണസംഘത്തിൽ ഉൾപ്പെടുന്നുണ്ട്. പിടിയിലായവരിൽ നാല് പേർ മാത്രമാണ് പ്രായപൂർത്തിയായവർ. ബാക്കി 11 പേർ പ്രായപൂർത്തിയാകാത്തവരായതിനാൽ അവരെ ജുവനൈൽ കോടതിയിൽ ഹാജരാക്കും. പ്രായപൂർത്തിയായവർക്കെതിരെ മൂവാറ്റുപുഴ പൊലീസ് കേസെടുത്തു.

മൂന്ന് ലക്ഷത്തിലേറെ രൂപ വിലമതിക്കുന്ന ഇരുമ്പ് സാമഗ്രികളാണ് നിർമാണ സ്ഥലത്തുനിന്ന് കടത്തിയത്. ആർഭാട ജീവിതത്തിന് പണം കണ്ടെത്തുക എന്ന ലക്ഷ്യത്തോടെയാണ് പ്രതികൾ മോഷണം ആസൂത്രണം ചെയ്തതെന്ന് പൊലീസിന്റെ പ്രാഥമിക അന്വേഷണത്തിൽ വ്യക്തമായി. മോഷണം പോയ സാധനങ്ങൾ ആക്രി വ്യാപാരി കുറഞ്ഞ വിലയ്ക്ക് വാങ്ങുകയും പിന്നീട് മറിച്ചുവിൽക്കുകയുമായിരുന്നു. ഇയാളുടെ പക്കൽ നിന്ന് സീൽ പൊട്ടിക്കാത്ത ഷട്ടറുകൾ ഉൾപ്പെടെയുള്ള നിരവധി സാധനങ്ങൾ പൊലീസ് കണ്ടെടുത്തിട്ടുണ്ട്.

സാമ്പത്തിക പരിമിതികളും എസ്റ്റിമേറ്റ് പുതുക്കലും കാരണം എട്ടു മാസമായി പ്രവർത്തനങ്ങൾ നിർത്തിവെച്ചിരുന്ന സ്ഥലത്താണ് മോഷണം നടന്നത്. വാളകത്തും സമീപ പ്രദേശങ്ങളിലും താമസിക്കുന്നവരാണ് പ്രതികളിൽ ഭൂരിഭാഗവും. കേസ് ഒത്തുതീർപ്പാക്കുന്നതിനായി നഷ്ടപരിഹാരം നൽകാനുള്ള ശ്രമങ്ങളും പ്രതിഭാഗം നടത്തുന്നുണ്ട്.

കഴിഞ്ഞ വ്യാഴാഴ്ചയാണ് മോഷണ വിവരം പഞ്ചായത്ത് അധികൃതരുടെ ശ്രദ്ധയിൽപ്പെട്ടത്. തുടർന്ന് പഞ്ചായത്ത് പ്രസിഡന്റ് രജിതാ സുധാകരൻ, വൈസ് പ്രസിഡന്റ് ജിജോ പാപ്പാലിൽ എന്നിവർ പൊലീസിലും ജല അതോറിറ്റിയിലും പരാതി നൽകുകയായിരുന്നു. സമീപകാലത്ത് പഞ്ചായത്തിലെ വിവിധ ക്ഷേത്രങ്ങളിലുണ്ടായ മോഷണ സംഭവങ്ങളുടെ പശ്ചാത്തലത്തിൽ പൊലീസ് അന്വേഷണം ഊർജിതമാക്കിയതാണ് പ്രതികളെ വേഗത്തിൽ പിടികൂടാൻ സഹായിച്ചത്.