നീറ്റ് പുനഃപരീക്ഷയിൽ ഇത്തവണ പിഴവുകളുണ്ടാകില്ല! മേൽനോട്ടം വഹിക്കുന്നത് പ്രധാനമന്ത്രി നേരിട്ടെന്ന് കേന്ദ്ര സർക്കാർ സുപ്രീം കോടതിയിൽ

ദില്ലി :മെഡിക്കൽ പ്രവേശന പരീക്ഷയായ നീറ്റ് യുജി ചോദ്യപ്പേപ്പർ ചോർച്ചയെത്തുടർന്ന് രാജ്യം അഭിമുഖീകരിക്കുന്ന പ്രതിസന്ധികൾക്കിടയിൽ, ജൂൺ 21-ന് നടക്കാനിരിക്കുന്ന പുനഃപരീക്ഷയിൽ യാതൊരുവിധ പാളിച്ചകളും ഉണ്ടാകില്ലെന്ന് കേന്ദ്രസർക്കാർ സുപ്രീം കോടതിയെ അറിയിച്ചു. പരീക്ഷാ നടപടികൾ സുഗമമായും സുരക്ഷിതമായും പൂർത്തിയാക്കാൻ പ്രധാനമന്ത്രി നരേന്ദ്രമോദി നേരിട്ട് മേൽനോട്ടം വഹിക്കുന്നുണ്ടെന്ന് കേന്ദ്ര സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത സുപ്രീം കോടതിയിൽ വ്യക്തമാക്കി. പരീക്ഷയുടെ വിശ്വാസ്യത ഉറപ്പാക്കുന്നതിനായി ചില പുതിയ ക്രമീകരണങ്ങൾ കേന്ദ്ര സർക്കാരും ദേശീയ പരീക്ഷാ ഏജൻസിയും ഏർപ്പെടുത്തിയിട്ടുണ്ടെന്നും അദ്ദേഹം കോടതിയെ ധരിപ്പിച്ചു.

പുനഃപരീക്ഷയുടെ സുരക്ഷ ഉറപ്പാക്കാൻ എന്തൊക്കെ മേൽനോട്ടങ്ങളാണ് ഒരുക്കിയിട്ടുള്ളതെന്ന സുപ്രീം കോടതിയുടെ പ്രത്യേക ചോദ്യത്തിനാണ് പ്രധാനമന്ത്രി തന്നെ നേരിട്ട് കാര്യങ്ങൾ നിരീക്ഷിക്കുന്നുണ്ടെന്ന മറുപടി കേന്ദ്രം നൽകിയത്. കേസിൽ വാദം കേൾക്കുന്നതിനിടെ ചോദ്യപ്പേപ്പർ ചോർച്ച പോലെയുള്ള ഗുരുതരമായ വീഴ്ചകൾ വിദ്യാർത്ഥികൾക്കും അവരുടെ കുടുംബങ്ങൾക്കും വലിയ രീതിയിലുള്ള മാനസികാഘാതമാണ് ഉണ്ടാക്കുന്നതെന്ന് സുപ്രീം കോടതി നിരീക്ഷിച്ചു. ഇത്തരം സംഭവങ്ങൾ ലക്ഷക്കണക്കിന് യുവാക്കളുടെ പ്രതീക്ഷകളെ തകർക്കുന്നതാണെന്നും അവരെ നിരാശരാക്കുന്ന സാഹചര്യം ഇനി ഉണ്ടാകരുതെന്നും കോടതി കർശനമായി അഭിപ്രായപ്പെട്ടു. പരീക്ഷയുടെ പരിശുദ്ധി കാത്തുസൂക്ഷിക്കാൻ എൻ.ടി.എ പ്രതിജ്ഞാബദ്ധമാണെന്നും ഇത്തവണ ചോദ്യപ്പേപ്പർ ചോരാതിരിക്കാൻ എല്ലാ മുൻകരുതലുകളും സ്വീകരിച്ചിട്ടുണ്ടെന്നും എൻ.ടി.എ സത്യവാങ്മൂലത്തിലൂടെ കോടതിയെ അറിയിച്ചിട്ടുണ്ട്.

അതേസമയം, ചോദ്യപ്പേപ്പർ ചോർച്ചയുമായി ബന്ധപ്പെട്ട് നിലവിൽ നടക്കുന്ന അന്വേഷണം എങ്ങനെയാണ് പൂർത്തിയാക്കുക എന്നത് സംബന്ധിച്ച് വിശദമായ സത്യവാങ്മൂലം സമർപ്പിക്കാൻ സുപ്രീം കോടതി കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്. പരീക്ഷാ നടത്തിപ്പിൽ വലിയ പോരായ്മകൾ ഉണ്ടായ പശ്ചാത്തലത്തിൽ, ഉയർന്ന സമിതികൾ നിലവിലുണ്ടായിട്ടും ഇത്തരം സംഭവങ്ങൾ ആവർത്തിക്കുന്നത് രാജ്യത്തെ പരീക്ഷാ സംവിധാനത്തിന്റെ തകരാറാണോ എന്ന് പരിശോധിക്കേണ്ടതുണ്ടെന്നും കോടതി ഓർമ്മിപ്പിച്ചു. മെയ് 3-ന് നടന്ന നീറ്റ് പരീക്ഷയിൽ വ്യാപകമായ ക്രമക്കേടുകൾ ഉയർന്നതിനെത്തുടർന്ന് മെയ് 12-നാണ് പരീക്ഷ റദ്ദാക്കിയത്. നിലവിൽ ഈ കേസിന്റെ അന്വേഷണം സിബിഐ ആണ് നടത്തിവരുന്നത്.