തൃക്കാക്കര ആവേശത്തോടെ വിധിയെഴുതുന്നു; കനത്ത പോളിങ്ങിന്റെ സൂചനകൾ വ്യക്തം; ചിലയിടങ്ങളിൽ യന്ത്രത്തകരാർ; മാധ്യമങ്ങളോട് സംസാരിക്കുന്നതിൽ നിന്ന് ബിജെപി സ്ഥാനാർത്ഥിയെ തടഞ്ഞ പോലീസ് പിന്നീട് പിൻവാങ്ങി

കൊച്ചി: വാശിയേറിയ തെരെഞ്ഞെടുപ്പ് പ്രചാരണങ്ങൾക്കൊടുവിൽ തൃക്കാക്കരയിലെ വോട്ടര്‍മാര്‍ ഇന്ന് വിധിയെഴുതുന്നു. 1,96,805 വോട്ടര്‍മാരാണ് തൃക്കാക്കരയിലുള്ളത്‌. ആകെയുള്ള 239 ബൂത്തുകളില്‍ അഞ്ചണ്ണം മാതൃകാ ബൂത്തുകളാണ്. പൂര്‍ണ്ണമായും വനിതകള്‍ നിയന്ത്രിക്കുന്ന ഒരു ബൂത്തും ഒരുക്കിയിട്ടുണ്ട്.
രാവിലെ ഏഴ് മണിക്ക് തന്നെ വോട്ടെടുപ്പ് ആരംഭിച്ചു. വൈകിട്ട് 6 മണി വരെയാണ് പോളിങ്. ചില ബൂത്തുകളില്‍ വോട്ടിങ്‌ മെഷീനില്‍ തകരാര്‍ കണ്ടെത്തിയതിനെ തുടര്‍ന്ന് ഉദ്യോഗസ്ഥര്‍ പരിശോധന നടത്തിവരികയാണ്. ചിലയിടത്ത് തകരാര്‍ പരിഹരിച്ചിട്ടുണ്ട്. രാവിലെ മുതൽ മിക്ക ബൂത്തുകളിലും വോട്ടർമാരുടെ നീണ്ട നിര ദൃശ്യമാകുന്നുണ്ട്. ഇത്തവണ തൃക്കാക്കരയിൽ കനത്ത പോളിംഗ് നടക്കുമെന്നതിന്റെ സൂചന ആദ്യ മണിക്കൂറുകളിലുണ്ട്. വോട്ടെടുപ്പ് എല്ലായിടത്തും സമാധാനപരമായി പുരോഗമിക്കുന്നു.

ഇടത് വലത് മുന്നണികളുടെ സ്ഥാനാർത്ഥികൾ വോട്ട് ചെയ്തു. ബിജെപി സ്ഥാനാർഥി എ എൻ രാധാകൃഷ്ണനെ മാധ്യമങ്ങളോട് സംസാരിക്കുന്നത്തിൽ നിന്ന് പോലീസ് വിലക്കിയത് നേരിയ വാക്കേറ്റമുണ്ടാക്കി. മറ്റു സ്ഥാനാർത്ഥികൾക്കില്ലാത്ത വിലക്ക് തനിക്കെന്തിനാണെന്നും മാധ്യമങ്ങളോട് സംസാരിക്കുകതന്നെ ചെയ്യുമെന്നും വേണമെങ്കിൽ പൊലീസിന് കേസെടുക്കാമെന്ന് എ എൻ നിലപാടെടുത്തതോടെ പോലീസ് പിന്മാറുകയായിരുന്നു.

സുഗമമായ തെരെഞ്ഞെടുപ്പ് നടത്തിപ്പിനായി വിപുലമായ സംവിധാനങ്ങൾ തൃക്കാക്കരയിൽ ഒരുക്കിയിട്ടുണ്ട് 956 ഉദ്യോഗസ്ഥരെയാണ് തെരെഞ്ഞെടുപ്പ് ചുമതലകൾക്കായി നിയോഗിച്ചിട്ടുള്ളത്. കള്ളവോട്ട് തടയാന്‍ പോളിംഗ് ഉദ്യോഗസ്ഥര്‍ക്ക് പ്രത്യേക നിര്‍ദേശം നല്‍കിയിട്ടുണ്ടെന്ന് ജില്ലാ കളക്ടര്‍ ജാഫര്‍ മാലിക് അറിയിച്ചു.
മഹാരാജാസ് കോളജിലാണ് സ്ട്രോങ്ങ് റൂം ഒരുക്കിയിട്ടുള്ളത്. മണ്ഡലത്തില്‍ പ്രശ്ന ബാധിത ബൂത്തുകളോ പ്രശ്ന സാധ്യതാ ബൂത്തുകളോയില്ല. എങ്കിലും കനത്ത സുരക്ഷയിലാണ് വോട്ടെടുപ്പ് നടക്കുന്നത്. സംസ്ഥാനമാകെ ഉറ്റുനോക്കുന്ന ഉപതെരഞ്ഞെടുപ്പിന്റെ വിധിയറിയാന്‍ വെള്ളിയാഴ്ച വരെ കാത്തിരിക്കണം.