വാകേരി മൂടക്കൊല്ലിയിൽ ഭീതി പടർത്തി വീണ്ടും കടുവ !പന്നി ഫാം ആക്രമിച്ച കടുവ കൊന്നു തള്ളിയത് 20 പന്നികളെ ! കടുവയെ പിടികൂടാൻ പ്രദേശത്ത് കൂട് സ്ഥാപിക്കാനൊരുങ്ങി വനം വകുപ്പ്

സുൽത്താൻ ബത്തേരി: വാകേരി മൂടക്കൊല്ലിയിൽ ഭീതി പടർത്തി വീണ്ടും കടുവയുടെ ആക്രമണം. സ്ഥലത്തെ പന്നി ഫാം ആക്രമിച്ച കടുവ അമ്പത് കിലോയോളം തൂക്കം വരുന്ന 20 പന്നികളെയും കൊന്നു. ഫാമിൽ നിന്നും അമ്പത് മീറ്ററോളം മാറിയുള്ള കുറ്റിക്കാട്ടിൽ പന്നികളുടെ ജഡം കൂട്ടത്തോടെ കണ്ടെത്തിയിട്ടുണ്ട്. മാത്രമല്ല രണ്ട് പന്നിക്കുഞ്ഞുങ്ങളെയും ഫാമിൽ ചത്തനിലയിലും കണ്ടെത്തിയിട്ടുണ്ട്. ഇന്നലെ രാത്രിയാണ് ആക്രമണം നടന്നതെന്ന് ഫാം ഉടമ പറഞ്ഞു. ആറുവർഷം മുൻപും ഫാമിൽ കടുവയുടെ ആക്രമണം നടന്നിരുന്നു.കൂടല്ലൂരിൽ ക്ഷീര കർഷനായ പ്രജീഷിനെ കടുവ കൊലപ്പെടുത്തിയ പ്രദേശത്ത് നിന്ന് ഏകദേശം ഒന്നര കിലോമീറ്റർ മാത്രമകലെയാണ് ഇപ്പോൾ ആക്രമണം നടന്ന സ്ഥലം

വനംവകുപ്പ് ഉദ്യോഗസ്ഥർ ഫാമിന് സമീപത്തെ കാൽപ്പാടുകൾ പരിശോധിച്ച് ആക്രമിച്ചത് കടുവ തന്നെയെന്ന് സ്ഥിരീകരിച്ചു. കടുവയെ പിടികൂടാൻ പ്രദേശത്ത് കൂട് സ്ഥാപിക്കാനും തീരുമാനിച്ചിട്ടുണ്ട്. പരിശോധനയ്ക്ക് സ്ഥലത്തെത്തിയ വനംവകുപ്പ് ഉദ്യോഗസ്ഥരോട് പ്രദേശവാസികൾ രോഷം പ്രകടിപ്പിച്ചു. ഉടൻ കൂട് സ്ഥാപിക്കണമെന്നും പന്നി ഫാം ഉടമയ്ക്ക് നഷ്ടപരിഹാരം നൽകണമെന്നും പ്രദേശവാസികൾ ആവശ്യപ്പെട്ടു.