പാലിയേക്കരയില്‍ വീണ്ടും ടോള്‍പിരിവ് ! തിങ്കളാഴ്ച മുതല്‍ വ്യവസ്ഥകളോടെ പുനരാരംഭിക്കാമെന്ന് ഹൈക്കോടതി

കൊച്ചി: പാലിയേക്കരയില്‍ നിർത്തി വച്ചിരുന്ന ടോള്‍പിരിവ് തിങ്കളാഴ്ച മുതല്‍ വ്യവസ്ഥകളോടെ പുനരാരംഭിക്കാമെന്ന് ഹൈക്കോടതി. തിങ്കളാഴ്ച ഇതുസംബന്ധിച്ചുള്ള ഉത്തരവ് ഹൈക്കോടതി പുറത്തിറക്കുക. ടോള്‍ പിരിച്ചിരുന്ന സമയത്ത് അഭിമുഖീകരിച്ചിരുന്ന ഗതാഗതക്കുരുക്കുള്‍പ്പെടെയുള്ള പ്രശ്‌നങ്ങള്‍ ഭാവിയില്‍ ഉണ്ടാകാതിരിക്കാനുള്ള വ്യവസ്ഥകളായിരിക്കും കോടതി മുന്നോട്ടുവെയ്ക്കുക. ഇതിന്റെ ഭാഗമായി മോണിറ്ററിങ് കമ്മിറ്റിയെ നിയമിക്കാനും സാധ്യതയുണ്ട്. റോഡുകളുടെ അറ്റകുറ്റപ്പണികളും അടിപ്പാതകളുടെ നിര്‍മാണവും ത്വരിതഗതിയില്‍ നടപ്പിലാക്കാനുള്ള വ്യവസ്ഥകള്‍ കോടതിയുടെ ഭാഗത്തുനിന്നുണ്ടായേക്കും.

ടോള്‍ പിരിവ് നിർത്തിയതിനെത്തുടർന്ന് മുന്നൂറ് തൊഴിലാളികളുടെ ജീവിതം പ്രതിസന്ധിയിലാണെന്ന കാര്യം ഇന്ന് കേസ് പരിഗണിക്കവേ കേന്ദ്രസർക്കാർ കോടതിയിൽ ചൂണ്ടിക്കാട്ടിയിരുന്നു. അതിനാൽ ടോൾ പിരിവ് പുനരാരംഭിക്കാനുള്ളത ഉത്തരവ് അടിയന്തരമായി നല്‍കണമെന്നും കേന്ദ്രസര്‍ക്കാര്‍ ആവശ്യപ്പെട്ടിരുന്നു.