വിതുര കല്ലാറിൽ വിനോദ സഞ്ചാരികൾ ഒഴുക്കിൽപ്പെട്ടു; മൂന്ന് പേർ മരിച്ചു

തിരുവനന്തപുരം: വിതുര കല്ലാർ വട്ടക്കയത്തിൽ വിനോദ സഞ്ചാരികൾ ഒഴുക്കിൽപ്പെട്ടു. അപകടത്തിൽ മൂന്ന് പേർ മരിച്ചു. ബീമാപ്പള്ളി സ്വദേശികളായ സഫാൻ, ഫിറോസ്, ജവാദ് എന്നിവരാണ് കയത്തിൽപ്പെട്ടത്. മൂന്ന് പേരും ബന്ധുക്കളാണ്. മരിച്ച ഫിറോസ് എസ് എ പി ക്യാമ്പിലെ പോലീസുകാരനാണ്. എട്ട് പേരടങ്ങുന്ന സംഘമാണ് കയത്തിലെത്തിയത്.

ഒരു പെൺകുട്ടിയാണ് ആദ്യം ഒഴുക്കിൽപ്പെട്ടത്. കുട്ടിയെ രക്ഷിക്കാനുള്ള ശ്രമത്തിനിടെയാണ് മറ്റുള്ളവരും ഒഴുക്കിൽപ്പെട്ടത്. നാട്ടുകാരാണ് ഇവരെ രക്ഷപ്പെടുത്തിയത്. സംഭവമറിഞ്ഞ് വിതുരയിൽ നിന്നും ഫയർ ഫോഴ്‌സ് സംഘവും സ്ഥലത്തെത്തി. കഴിഞ്ഞ ദിവസം പ്രദേശത്ത് ശക്തമായ മഴയുണ്ടായിരുന്നു. ശക്തമായ ഒഴുക്കും അപകടസമയത്തുണ്ടായിരുന്നു. അപകട മുന്നറിയിപ്പ് അവഗണിച്ചാണ് ഇവർ കയത്തിലിറങ്ങിയതെന്ന് നാട്ടുകാർ പറയുന്നു.