ത്രിരാഷ്ട്ര ഫുട്‌ബോൾ ടൂർണമെന്റ്;ഇന്ത്യൻ പടയോട്ടമാരംഭിച്ചു; ഏകപക്ഷീയമായ ഒരു ഗോളിന് മ്യാൻമാറിനെ തോൽപ്പിച്ചു

ഇംഫാല്‍: ത്രിരാഷ്ട്ര ഫുട്‌ബോള്‍ ടൂര്‍ണമെന്റിൽ ഇന്ത്യ വിജയത്തോടെ തുടങ്ങി. ടൂർണമെന്റിലെ ഉദ്ഘാടന മത്സരത്തില്‍ ആതിഥേയരായ ഇന്ത്യ മ്യാന്‍മാറിനെയാണ് എതിരില്ലാത്ത ഒരു ഗോളിന് കീഴടക്കിയത്. മണിപ്പൂരിലെ ഖുമാന്‍ ലാംപാക് സ്റ്റേഡിയത്തില്‍ വച്ചായിരുന്നു മത്സരം.

ആദ്യപകുതിയുടെ ഇന്‍ജുറി ടൈമില്‍ അനിരുദ്ധ് ഥാപ്പയാണ് ഇന്ത്യയുടെ വേണ്ടി നേടിയത്. ബോക്‌സിലേക്ക് വന്ന ക്രോസ് മ്യാന്‍മാര്‍ പ്രതിരോധതാരം കഷ്ടപ്പെട്ട് രക്ഷപ്പെടുത്തിയെങ്കിലും പന്ത് റാഞ്ചിയെടുത്ത ഥാപ്പ കൃത്യമായി വലയിലെത്തിക്കുകയായിരുന്നു.

മത്സരത്തിലുടനീളം ആധിപത്യം പുലര്‍ത്തിയ ഇന്ത്യ ആറുതവണയാണ് ലക്ഷ്യത്തിലേക്ക് പന്ത് പായിച്ചത്. മത്സരത്തിൽ നിരവധി സുവർണാവസരങ്ങളും ഇന്ത്യ തുലച്ചു. അടുത്ത മത്സരത്തില്‍ കരുത്തരായ കിര്‍ഗിസ്ഥാനാണ് ഇന്ത്യയുടെ എതിരാളി. മാര്‍ച്ച് 28 ന് വൈകിട്ട് ആറുമണിക്കാണ് മത്സരം.