ബംഗാളിൽ ജനമധ്യത്തിൽ ദമ്പതികളെ തൃണമൂൽ നേതാവ് ചാട്ടവാറുകൊണ്ടടിച്ച സംഭവം; അടിയന്തര നടപടിയുമായി രാജ്ഭവൻ ! മുഖ്യമന്ത്രിയോട് റിപ്പോർട്ട് ആവശ്യപ്പെട്ട് ഗവർണർ സി വി ആനന്ദ ബോസ്

കൊൽക്കത്ത: ഉത്തർ ദിനാജ്പൂർ ജില്ലയിൽ ദമ്പതികളെ ജന മധ്യത്തിൽ പരസ്യമായി ചാട്ടവാറുകൊണ്ടടിച്ച സംഭവത്തിൽ വിശദമായ റിപ്പോർട്ട് സമർപ്പിക്കാൻ പശ്ചിമ ബംഗാൾ ഗവർണർ സിവി ആനന്ദബോസ് മുഖ്യമന്ത്രി മമത ബാനർജിയോട് ആവശ്യപ്പെട്ടു. ചോപ്രയിലെ പ്രാദേശിക തൃണമൂൽ നേതാവായ തജ്മുൽ എന്ന ‘ജെസിബി’യാണ് ദമ്പതികളെ മർദ്ദിച്ചതെന്ന് തിരിച്ചറിഞ്ഞിരുന്നു . ഇയാൾ നിലവിൽ പോലീസ് കസ്റ്റഡിയിലാണ്. ഇതിനിടെ തൻ്റെ വീഡിയോ സമൂഹമാദ്ധ്യമങ്ങളിൽ പ്രചരിപ്പിച്ച് പരസ്യമായി അപമാനിച്ചവർക്കെതിരെ നടപടിയെടുക്കണമെന്നാവശ്യപ്പെട്ട് അതിജീവിത പോലീസിൽ പരാതി നൽകിയിരുന്നു. പിന്നീട്, ചാട്ടവാറടിയേറ്റ സ്ത്രീയെ ചോപ്രയിലെ തൃണമൂൽ എംഎൽഎ ഹമീദുൽ റഹ്മാൻ സ്വഭാവഹത്യ ചെയ്തതായും പരാതി ഉയർന്നു.

ഗവർണറുടെ ഓഫീസിനെ അപകീർത്തിപ്പെടുത്തുന്ന തരത്തിൽ തെറ്റായ വിവരങ്ങൾ നൽകിയെന്ന ആരോപണം നേരിടുന്ന കൊൽക്കത്ത പോലീസ് കമ്മീഷണർ വിനീത് ഗോയൽ, ഡിസിപി എന്നിവർക്കെതിരെ സ്വീകരിച്ച നടപടികളെക്കുറിച്ച് വിശദമായ റിപ്പോർട്ട് സമർപ്പിക്കാനും മുഖ്യമന്ത്രിയോട് ഗവർണർ ആവശ്യപ്പെട്ടു.

ബംഗാൾ ഗവർണറുടെ ഓഫീസിനെ അപകീർത്തിപ്പെടുത്തിയതിന് കൊൽക്കത്ത പോലീസ് കമ്മീഷണർക്കും ഡിസിപി സെൻട്രലിനുമെതിരെ കേന്ദ്ര ആഭ്യന്തര മന്ത്രാലയം അച്ചടക്ക നടപടി ആരംഭിച്ചതിന് തൊട്ടുപിന്നാലെയാണിത്. ഭരണഘടനയുടെ ആർട്ടിക്കിൾ 166, 167, പശ്ചിമ ബംഗാളിന്റെ ബിസിനസ് റൂൾസ് 30 എന്നിവ പ്രകാരം ഗവര്ണറിൽ നിക്ഷിപ്തമായ അധികാരം ഉപയോഗിച്ചാണ് നടപടി.